Den Bybel met groter neersticheyt ghecorrigeert (Liesveltbijbel 1542)

¶ Vermaninghe totter wijsheyt, waerschout ons die wijsheydt voor die vrouwen, ende alle aenuechtinghe, Ende vertelt oock wat schade daer wt coemt, alsmen dien aenhangt, Leert oock datmen den benauden vriendelijcken bystaen sal, ende bescrijft ooc deynde der godloosen.

Dat .v. Capittel.

1

⁺MIne kint aenmerct mijne wijsheyt, neyget v oore tot mijnen verstande,

+ A vers 1

2

op dat ghi behout voordachticheyt, ende uwe lippen die kennisse bewaren,

3

want dye lippen der hoeren sijn een honichseem, ende haer kele is ghelatter dan olye,

4

Mer namaels bitter gelijc alsene, ende scherp gelijc een sweert aen beyde siden snijdende,

5

Hare voeten loopen totten doot onderwaerts, hare ganghen vercrijghen die helle,

6

Si en gaet nyet recht opten wech des leuens, hare treden sijn ongestadich, dat si niet en weet waer si gaet.

7

Dus hoort mi nv mijn kint, ende en wijcket niet vander redene mijns monts,

8

laet uwe weghen verre van haer zijn, ende en genaket nyet totter dueren haers huys

9

⁺op dat ghi den anderen uwe eere niet en geeft, ende uwe iaren den grouweliken.

+ B vers 9

10

Dat die vreemde hen niet van uwen vermogen en versaden, ende uwen arbeyt niet en si in eens anders huys,

11

Ende moet namaels suchten, als ghy v lichaem ende goet verteert hebt,

12

ende seggen och hoe heb ic die castiende onderwijsinge gehaet, ende in mijne herte die straffinge versmaet,

13

Ende en hebbe niet gehoort die stemme mijnder leeraers, ende mijn oore niet gheneycht totten ghenen die my leerden,

14

Ic ben schier in alle ongeluc gecomen onder die ghemeynte ende vergaderinghe.

15

⁺Drinct water wt dijnen putte, ende voedet wt uwen fonteynen,

+ C vers 15

16

Laet uwe fonteynen wt vloeyen, ende die waterbeken op die straten.

17

Mer hebbet ghise alleene ende geen vreemde met v,

18

V fonteyne si geseegent, ende verblijt vanden wijue uwer ioncheit,

19

lieflick is die hynde, vrienthout dat ree, laet v haer liefde altoos versaden, ende vermaect v altoos in haerder liefden.

20

⁺Mijn kint waeromme wilt ghy v aen die vreemde vermaken, ende omhelset een andere,

+ D vers 20

21

want yeghelicx wegen sijn stracx voor den HERE, ende hi metet alle haer ganghen,

22

Die misdaet des godloosen sal hem vaen, ende sal metten strick sijnder sonden ghehouden worden,

23

Hi sal steruen sonder castiende onderwijsinghe, ende om sijnder groter dwaesheyt wille sal hi dolen.