Den Bybel met groter neersticheyt ghecorrigeert (Liesveltbijbel 1542)

Dat .xxiij. Capittel.

1

⁺ALs ghi sidt ende etet met eenen heere, Soo merct daer op wat voor v staet.

+ A vers 1

2

Ghi stoot een messe in v keele, wilt v siele van als eten.

3

En wenschet v niet van sijnder spijsen, want het is valsch broot.

4

En vermoeyt v niet om rijc te worden, ende hout op van uwen verstande.

5

En laet uwe ooghen niet derwaert vlieghen, dat ghi niet hebben en moecht, want dat selue maect hem vlogelen, gelijc eenen aerne, ende vliecht ten hemele.

6

En etet geen broot bi eenen nijdigen, ende en wenschet v niet van sijnder spijsen.

7

Want gelijc een ongehuere in sijnder sielen, soo spreect hi, etet ende drincket, Ende sine herte en is nochtans niet met v.

8

Vwe beten dye ghi gheten hebt moet ghi wt braken, Ende moet uwe lieflijcke woorden verloren hebben.

9

En spreect nyet voor des sotten ooren, want hi veracht die cloecheit uwer redenen.

10

En drijft niet te rugghe die voorledene palen, Ende en gaet niet opter weesen acker,

11

want haer verlosser is machtich, ⁺ die sal hare sake teghen v beleyden.

+ B vers 11

12

Gheeft uwe herte tot der castijender onderwijsinge, ende uwe oore totter redene der besceydenheyt.

13

En hout niet op, den iongelinc te castijen Want al slaet ghi hem metter roeden, hi en sterft daer niet af.

14

Ghi slaet hem metter roeden, Maer ghy verlost sine siele vander hellen.

15

Mijn sone ist dat ghy wijs sijt, So verblidet mijn herte hem ooc.

16

Ende mijne nieren sijn vrolic, Als uwe lippen spreken dat gherecht is.

17

V herte en werde niet zelours ouer die sondaers, Mer het si daghelicx inder vreesen des HEREN.

18

Want het en is noch niet aen deynde, Ende v wachten en sal niet faelgeren.

19

Mijne sone hoort, ende sijt wijs, So sal uwer herten wel sijn opten wech, En sijt niet onder die suypers ende fluymers,

20

⁺Want die suypers ende fluymers verarmen, ende een slaper moet verschoorde cleederen draghen.

+ C vers 20

21

Hoort uwen vader dye v gewonnen heuet, ende en veracht uwe moeder niet, als si out wort

22

Coopt waerheit, ende en vercooptse niet, Wijsheyt, onderwijsinghe, ende verstant.

23

Een vader des gherechten verblijdet hem billicx, Ende wie eenen wijsen ghewonnen heeft, is vrolick daer ouer.

24

Laet hem uwe vader ende moeder verblijden, Ende vrolijc sijn die v ghebaert heeft.

25

Gheeft my mijne sone v herte, ende laet uwe ooghen mijn weghen welbehagen

26

Want een hoere is een diepe gracht, ende die vreemde is eenen enghen put.

27

Sy laget oock ghelijck een roouer, Ende die onachtsame onder die menschen vergadert si tot haer.

28

Waer is wee? Waer is leedt? Waer is twist? Waer sijn cuylen? Waer sijn wonden sonder sake? Waer sijn roode ooghen?

29

Te wetene waermen byden wijn sidt, Ende coemt wt te suypen so wat ingheschenct is.

30

En siet den wijn niet ane dat hi rootachtich is, ende gheeft int ghelas sijn gedaente, hi gaet saecht inne.

31

Maer ten laetsten bijtet hi gelijc een slange, Ende breydet hem wt ghelijc een Adere.

32

⁺So sullen uwe ooghen na andere wijuen sien, Ende v herte sal verkeerde dinghen spreken.

+ D vers 32

33

Ende sult sijn gelijc eenen die midden in die zee slaept ende gelijc eene die bouen opten mastboom slaept.

34

Si slaen mi, mer het en doet mi niet seer, si nopen mi, mer ick en gheuoele dat niet.

Wanneer sal ic ontwaken, dat icx meer soecke.