Den Bybel met groter neersticheyt ghecorrigeert (Liesveltbijbel 1542)

¶ Dat .xxviij. Capittel.

1

⁺DIe godloose vlucht, ende nyemandt en iaecht hem mer die gerechte is getroost, ghelijc eenen ionghen leeuwe.

+ A vers 1

2

Om des lants sonden wille, moet het vele princen hebben, om der lieden wille, die verstandich ende bescheyden sijn, blijft hi lange leuende.

3

Een arm man die dye verachte leet doet, is ghelijc eenen stofreghen, die die vruchten bederft.

4

Die die wet verlaten, louen den godloosen, Maer die het bewaren, sijn onwillich op hen.

5

Quade lieden en mercken niet op doordeel, Mer dye na den HERE vraghen, mercken op alle.

6

Een arme die in sine vroomheit gaet, is beter dan een rijcke, die in verkeerden weghen gaet.

7

Wye dye wedt bewaert, is een verstandich kint, Mer wie sluymers voedet, beschaemt sinen vader.

8

Wye sine goet vermeerdert met woeckere, ende ouersettinge, die vergadere tot profijte der armer.

9

⁺Wye sinen ooren afkeeret die wet te hooren, dies ghebet is een vereysen.

+ B vers 9

10

Wie die oprechte verleyt op eenen quaden wech, Die sal in sinen cuyle vallen, maer die vrome sullen goet beeruen.

11

Eenen rijcken duncket dat hi wijsch is, Mer een arme verstandige ondersoect hem.

12

Inder blijschappen der gherechtigher is vele beroemens, Maer als die godloose op comen, veranderet metten lieden.

13

Wie sine misdaet loghent, dien en salt niet ghelucken, Maer wiese belijdet, ende laet, die sal ontfermherticheyt vercrijghen.

14

Wel dien, die altoos vreest, maer wie hardtmoedich is, sal in ongheluc vallen.

15

Een godloose, dye ouer een arm volc regneert, ⁺ dat is eenen briesschenden leeuwe, ende ghierighen beyre.

+ C vers 15

16

Ist dat een prince sonder verstant is, so gheschiet veel onrechts, Maer so wie die gerechticheyt hatet, die sal lange leuen.

17

Een mensche dye aent bloet eender sielen onrecht doet, die en wert niet onderhouden, al waert, dat hy ooc in die helle voere.

18

Die vroom henen gaet die sal ghenesen, mer wye

[p. *]

van verkeerden weghe is, die sal eens veruallen.

19

Wie sinen acker bouwet, dye sal broots ghenoech hebben, Mer wie na ledich gaen staet, sal armoeden genoech hebben.

20

Een ghetrouwe man wert vele gheseegent, ⁺ Mer wie haestet rijc te worden, dye en sal niet onschuldich blijuen.

+ D vers 20

21

Persoonen aensien en is niet goet. Want hi dedet quaet oock om een stuck broots.

22

Wie tot rijcdom haestet, ende is nijdich, Dye en weet niet, dat hem ongheualle ontmoeten sal.

23

Wie eenen mensche straft, dye sal namaels gonste vinden, Meer dan die daer flattert.

24

Wye sinen vader oft moeder neemt, ende seyt, Het en si gheen sonde, die is der verderuers gheselle.

25

Een stoute verwect kijf, maer wye hem opten HERE verlaet wert vette.

26

Wie hem op sijn herte verlaet, is een sot, Maer so wie met wijsheyt gaet, salt ontcomen.

27

Wie den armen geeft, dien en sal niet ghebreken, Mer wie sine oogen afkeert, die sal seer afnemen.

28

Als die godloose op comen, so verberghen hen die lieden, Mer als si vergaen, so wert der gerechtiger vele