Den Bybel met groter neersticheyt ghecorrigeert (Liesveltbijbel 1542)

Dat .xxix. Capittel.

1

⁺WIe teghen dye straffinghen hardtneckich is, Dye sal onuerhuets verderuen sonder alle hulpe.

+ A vers 1

2

Wanneer der gherechtigher vele is, so verblijdet hem dat volck, maer als dye godloose heerschapt, so suchtet dat volck.

3

Wye wijsheyt bemint, die verblijdet sinen vader, Meer so wye hem met hoeren gheneert werdt sijns ghelts quijt.

4

Een coninck recht dat lant op door dat oordeele, Mer een ghierighe verderft dat.

5

Wye met sinen nasten flatteert, dye bereydt een nette tot sinen voetstappen.

6

Als een quade sondicht so bestrict hi hem seluen, Maer een gherechte verblijt hem, ende heeft ghenoechte.

7

Dye gherechte bekennet dye sake der armer, Mer die godloose en achtet geen bescheydenheyt.

8

Die ^a spotters doen wreedelick metter stadt, ⁺ Mer dye wijse stillen die toornicheyt.

a Spotters, dat sijn dye valsche leeringen saeyen, ende versierden godsdienst leeren, ende secten indringhen. Actu. xxiiij.b

+ B vers 8

9

Ist dat een wijse met eenen sotte ten oordeele coemt, Hi si gram oft lachghe, so en heeft hi geene rust.

10

Dye bloetgierige haten den vromen, maer dye oprechtighe soecken sine siele.

11

Een sotte stort sinen gheest altemale wt, Mer die wijse hout hem in.

12

Een heere die lust tot luegen heeft, dyes dienaren sijn alle godloos.

13

Een arme ende woeckenaer ghemoeten malcanderen, Alder beyder ooghen verlicht die HERE

14

Een coninc die den armen ghetrouwelijck oordeelt, Diens throon sal eewelic staende blijuen.

15

Roede ende straffinge geeft wijsheyt, Mer een kint hem seluen ghelaten, beschaemt sijn moeder.

16

⁺Waer vele godloosen sijn, daer sijn veel sonden, mer die gherechtighe sullen haren valle verleuen.

+ C vers 16

17

Castijende onderwijst uwen sone, ende hi sal v vermaken, Ende sal uwer sielen saecht doen.

18

Als die prophecie wt is, soo vaert dat volc daer henen, Maer wel dien, die die wet vast hout.

19

Een knecht en laet hem met woorden nyet castijen, Want al verstaet hijt, hi en nemes hem niet ane.

20

Siet ghi eenen snelle om te spreken, Daer is aen eenen sotten meer hopens dan aen hem.

21

Wanneer een knecht leckerlick van ioncx op ghehouden wert, ⁺ So wil hi namaels een ioncheer sijn.

+ D vers 21

22

Een toornich man beroct kijfagien, Ende een verbolgene doet veel sonden.

23

Die houaerdicheyt des menschen sal hem vernede-ren, Mer den nederen moet sal eere ontfaen.

24

Wie met dieuen deel heeft, hatet sijn siele, Hi hooret lasteren, ende en gheeft dat niet te kennen.

25

Menschen ontsien, bringt te valle, Mer wie hem op den HERE verlaet, die wert bescuddet.

26

Veel soecken dat aensichte eens princen, Mer elcx oordeele coemt vanden HERE.

27

Een onrecht man is den gherechten een vereinsen, Ende wie recht van weghe is, die is der godloosens vereynsen.