Den Bybel met groter neersticheyt ghecorrigeert (Liesveltbijbel 1542)

¶ Ouerdenckinge van menigherley dinghen. Item dat daer niet so hooch en sy, ist dattet sine officie veracht, so wordet ooc veracht.

Dat .iiij. Capittel

1

⁺ICk keerde my, ende sach aen alle dye onrecht lijden onder der sonnen, Ende siet daer waren tranen der geender die onrecht lijden, ende en hadden gheenen trooster ende die hen onrecht deden waren te machtich, also dat si gheenen trooster ghehebben en consten.

+ A vers 1

2

Doen loofde ick die dooden, die al te voren gestoruen waren, meer dan die leuende, die noch dat leuen hadden,

3

Ende dien noch beter dan alle beyde, dye noch niet en is, ende die boose wercken niet en siet, dye onder der sonnen gheschieden.

4

Ic aensach arbeyt ende ghescictelicheyt in allen saken Doen benijde deen den anderen, ⁺ Dat is ymmer ooc ydelheyt ende moeyte,

+ B vers 4

5

Want een sot slaet die vingeren in malcanderen ende etet sijn vleesche,

6

Het is beter een hant vol met rusten, dan beyde die vuysten vol met moeyte ende iammer.

7

Ic keerde mi, ende sach die ydelheyt onder der sonnen,

8

Daer is een eenige ende niet sijn andere, ende en hadde noch kint, noch broedere, nochtans en is sijns arbeyts gheen eynde, ende sine ooghen en werden niet sadt rijcdoms, wien arbeyde ic doch, ende breke mijnder sielen af? Dat is ymmer ooc ydelheyt ende een quade moeyte,

9

⁺So ist ymmer beter twee dan een, want si genieten doch haers arbeyts wel.

+ C vers 9

10

Vallet haerder eene, so helpt hem sijn geselle op, ende wee den ghenen, dye alleene is, Als hi valt, so en is daer geen andere dye hem ophelpt,

11

Ooc als twee bi malcanderen liggen, verwermen si malcanderen, hoe can een alleen werm gheworden?

12

Eene mach verweldiget worden, Maer twee mogen wederstaen, want een drieuoudich snoer en breect niet lichtelijc in tween.

13

Een arm kint dat wijsch is, is beter dan een oude coninc die sot is, ende en weet hem niet te voorsien.

14

⁺Daer comt een wt der gheuangenisse totten Conincrijck, ⁺ Ende eene die in sine conincrijcke geboren is, verarmt.

+ D vers 14

+ ec. xv.c.

15

Ende ic sach dat alle leuende onder der sonnen wandelen bi eenen anderen kinde, die in des geens plaetse sal opcomen,

16

Ende des volcx dat voor hem ginc, en was gheen eynde, ende des dat hem nae ghinck, ende en worden van hem nochtans niet blijde, Dat is ymmer ooc ydelheyt ende iammer.