Den Bybel met groter neersticheyt ghecorrigeert (Liesveltbijbel 1542)

¶ Teghen die rijcke die haerder rijckdommen niet en deruen ghenieten, hoe dwaes dat die selue sijn.

Dat .vi. Capittel.

1

⁺DAer is een ongeluc dat ic sach onder der sonnen, ende is ghemeyne byden menschen,

+ A vers 1

2

Eenen dien God rijcdom, goeden, ende eere ghegheuen heeft, ende hem en gebreect geens, dat sijn herte begheert, ende God hem nochtans gheen macht en gheeft, des seluen te ghenieten, Maer een ander verteeret, Dat is ydele ende een quade plaghe,

3

Al waert dat hy oock hondert kinderen wonne, ende leefde so lange, dat hi veel iaren ouerleefde, ende sine siele en versadet haer van dien goede nyet, ende bleef sonder graft, Van dien spreke ick dat een ontijdige gheboorte beter si dan hy,

4

want in ydelheit coemt hi, ende in duysternisse vaert hi daer henen, ende sinen name blijft in duysternisse bedect.

[p. *]

5

Hi en siet ooc die sonne niet, ende en weet gheen ruste, noch hier noch daer,

6

al waert dat hi ooc twee dusent iaer leefde, so en heeft hi nymmermeer gheenen goeden moet, ⁺ En comet niet al tot eender plaetsen.

+ B vers 6

7

Alle arbeyden des menschen sijn nae sijnder mate, Mer die siele en werdet niet sadt,

8

want wat heuet een wijse meer, dan een sotte? want wat helpet den armen dat hi wete te wandelen voor die leuende,

9

Die gedaente der oogen is beter, dan dat die siele so wech vaert, dat is ooc ydelheyt ende iammer.

10

Wat is dat daer is? Het is ymmertoes genoemt ende bekent, dat een mensche is, ende en mach niet twisten, tegen dien dat hem te machtich is,

11

want daer sijn ydele woorden te vele, wat heeft een mensche meer daer af.