Den Bybel met groter neersticheyt ghecorrigeert (Liesveltbijbel 1542)

Dat .iij. Capittel

1

⁺IC sochte snachts in mijn bedde, dien mijn siel bemint. Ic socht, mer ic en vant hem niet.

+ A vers 1

2

Ic wil opstaen, ende in die stadt omme gaen, op die steechskens ende straten, ende soecken dien, dye mijn siele bemint. Ic sochte mer ic en vant hem niet,

3

Die wachters die in die stadt omme gaen, die vonden mi, En hebt ghy niet gesien dien mijn siele bemint? Doen ic een weynich voor bi hen quam, doe vant ic dien mijn siele bemint.

4

Ic houde hem, ende en wilde hem niet laten tot dat ic hem brenge in mijnder moeder huys, in mijnder moeder camer

5

⁺Ic beswere v ghi dochteren Ierusalem, biden reehen oft hijnden opten velde, dat ghi mijne vriendinne niet op en wect, noch en roert tot dat haer van selfs beuallet.

+ B vers 5

6

Wie is die die opclimt wt der woestijnen, gelijc eenen rechten rooc, gelijc een geriecke van myrren, wierooc, ende alderley puluer eens apotekers.

7

Siet rontsomme dat bedde Salomo staen tsestich stercke wt den stercken in Israel,

8

⁺Si houden alle swaerden, ende sijn bequame te strijden, Een yegelic heeft sijn sweert aen sijn dgye, om der vreesen wille inder nacht.

+ C vers 8

9

Die coninck Salomo liet hem eenen bedstadt maken van hout wt Libanon,

10

der seluer calomnen waren silueren, dat decsel gulden, dat sitten purpuren, dyen vloer midden in, was lieflic geplaueyt, ⁺ om der dochteren te Hierusalem wille.

+ D vers 10

11

Gaet wt ende aenschouwet ghi dochteren Zyon den Coninc Salomo in die croone, daer mede hem sijn moeder gecroont heeft inden dage sijns hoochtijts, ende inden dage der blijscappen sijns herten.