Den Bybel met groter neersticheyt ghecorrigeert (Liesveltbijbel 1542)

¶ Dat .iiij. Capittel.

1

⁺SIet mijne vriendinne, ghi sijt scoone, siet scoone sijt ghi, uwe oogen sijn gelijc duyuen oogen, behaluen dat daer binnen verborgen is, Vwe hayrlocken is gelijck die geyten cudden, die ghescoren sijn opten berch Gilead,

+ A vers 1

2

Vwe tanden sijn ghelijc die cudde met besnedender wolle, die wt der wasschen comen, die altemael twee vruchten draghen, ende onder hen en is gheen onuruchtbaer.

3

Vwe lippen sijn gelijc een rosijn varwen snoer, ende uwe redene lieflic. Vwe wanghen sijn gelijc die schale aenden granaetappele, behaluen dat daer binnen verborghen is.

4

⁺Vwen hals is ghelijc den thoorne Dauid, met borstgeweere getimmert, daer aen duysent schilden hanghen, ende alderhande wapenen der stercken,

+ B vers 4

5

Vwe twee borsten sijn gelijc twee ionghe reehen, twee vruchten, die onder die roosen weyden,

6

tot dat den dach coel worde, ende die scaduwe wijcke, Ic wil totten myrren berch gaen ende totten wieroock houele.

7

Ghi sijt in alder manieren scoone, mijne vriendinne, ende daer en is geen vlecke aen v,

8

comt mijn bruyt van Libanon, coemt van Libanon, gaet inne, treet herwaerts vander hoochten Amana, vander hoochten Senir, ende Hermon, vander wooninghen der leeuwen, vanden berghen der leopaerden.

9

Ghi hebt mi dat herte ghenomen mijne suster lieue bruyt, met uwer ooghen eene, ende met uwer hals ketene eene.

10

⁺Hoe fray sijn uwe borsten mijn sustere, lieue bruyt Vwe borsten sijn lieflijcker dan wijn, ende den ruecke uwer saluen gaet te bouen alle welrieckende cruyden,

+ C vers 10

11

uwe lippen mijne bruyt, sijn gelijc druypende honichraten, honich ende melc is onder uwe tonge, ende uwer cleeder rueck, is gelijc den wieroocx ruecke.

12

⁺Mijne suster lieue bruyt, ghi sijt eenen beslotenen hof Een besloten fonteyn adere, eenen beseghelden putte,

+ D vers 12

13

uwe spruytkens sijn ghelijc een lusthof van granaet appelen, met edelen vruchten, cyperen met Narden,

14

Narden met soffraen, calmus ende caneele, met alderley boomen, Libanon, myrrhe ende Aloes, met allen besten welrieckenden cruyden.

15

Gelijc een hoffonteyne, gelijc een fonteyne der leuender wateren, die van Libano vloeyen,

16

Staet op noortwint, ende coemt zuytwint, ende waeyt door minen hof, op dat alle sijn welrieckende cruyden druypen.