Den Bybel met groter neersticheyt ghecorrigeert (Liesveltbijbel 1542)

¶ Dat .v. Capittel.

1

⁺MIne vrient come in sinen hof, ende ete van sine vruchten. Comt mijne suster lieue bruyt in minen hof. Ic hebbe mijne myrre met mijnen welrieckenden cruyden af ghebroken, Ic heb mijne rate met mijnen huenich geten, Ic heb mijnen wijn met mijnen melcke ghedroncken. Etet mijne beminden, ende drinct mijne vrienden ende wert droncken.

+ A vers 1

2

Ic slape, mer mijn herte waket, daer is die stemme mijns vrients, die clopt, doet mi open lieue vriendinne mijn suster, mijn duyue, mijne vrome, want mijne hooft is vol daus, ende mijn vlechten sijn vol nachtdruppelen.

3

⁺Ic hebbe mijnen rock wtgetrocken, hoe sal ic hem weder aengetrecken, Ic heb mijne voeten ghewasschen, hoe sal icse weder vuyl maken.

+ B vers 3

4

Mer mine vrient steect sijn hant door tgat, ende mijn lichaem beefde daer af,

5

doen stont ic op, dat ic mijnen vrient open soude doen.

6

Mijne handen dropen met myrrhen, ende myrren liepen ouer mine vingeren aenden handen aent slodt. Ende doen ic mijnen vrient open ghedaen hadde, was hi wech ende henen ghegaen.

7

⁺Doen ghinc mijne siele wt na sijn woort, ic socht hem, mer ic en vant hem niet, Ic riepe, mer hi en antwoorde mi niet, die bewaerders die in die stadt omme gaen vonden mi, Die sloegen mi wonden. De bewaerders opter mueren, namen mi mijnen doecke.

+ C vers 7

8

Ic beswere v ghi dochteren Hierusalem vindet ghi minen vrient, so segt hem dat ic van minnen cranck ligghe.

9

Wat is uwe vrient voor andere vrienden, O ghy schoonste onder den wijuen? Wat is uwe vrient voor

[p. *]

andere vrienden, dat ghi ons so besworen hebt,

10

Mine vrient is witte ende root, wtgecoren onder veel duysenden,

11

Sine hooft is dat fijnste gout, Sine vlechten sijn gecruyst swart, gelijc een rauen

12

Sine oogen sijn gelijc duyuen oogen, aen die waterbeken, met melc gewasschen, ende staen in die volheyt,

13

⁺Sine kinnebacken sijn gelijc die wassende welriekende cruyts gerdekens der apotekers, Sijn lippen sijn gelijc roosen, die met vloyender myrrhen druypen,

+ D vers 13

14

sijn handen sijn gelijc guldene ringen vol Torkoysen, sijn lichaem is gelijc reyn yuorien met zaphirien ouertrocken,

15

sine beenen zijn gelijc marmor calomnen, gefundeert op gulden voeten sijn gedaente is gelijc Libanon, wtuercoren ghelijck cederen. Sijn kele is soete ende geheel lieflic.

16

Een sodanigen is mijn vrient, mine vrient is een sodanige, ghi dochteren Ierusalem.