Den Bybel met groter neersticheyt ghecorrigeert (Liesveltbijbel 1542)

Noch vanden voorgaenden, Ende ooc van die roepinge der heydenen.

Dat .xix. Capittel

1

⁺DIt is den last ouer Egipten. Siet, Dye HERE sal op een ^a snelle wolc varen ende in Egipten comen. Dan sullen die afgoden Egipti voor hem beuen ende den Egiptenaers sal dat herte versaecht wor-

+ A vers 1

a snellic op een wolcke varen, is cortelijc straffen, ende versoecken. ps. xvij b

[p. *]

den in haren lijue.

2

Ende ic wil die Egiptenaers tegen malcanderen hissen, also dat deen broeder tegen den anderen, deen vrient tegen den anderen, deene stadt tegen dandere, ende deen rijc tegen dat andere oorlogen sal.

3

Ende den moet sal den Egiptenaers onder haer vergaen, ende ic wil haer opstellen te niete maken. Dan sullen si vragen haren afgoden ende beelden, ende waerseggers, ende teekenbedieders.

4

Maer ick wil die Egyptenaers ouer geuen inden handen van grouwelijcken heeren, ende een felle coninc sal haer regeren, spreect die heerscher die HERE Sebaoth.

5

⁺Dat ^a water aenden meyr sal wtgesopen worden, daer toe dien stroom sal versipen ende verdrooghen,

+ B vers 5

a Door dat water meyr ende stroomen, wordet beteekent, dat der goddelooser vleeschelijcke cracht ende valsche leeringe sal te niete gedaen worden ende vernielt Ieremie viij. ij.regum. xvi.

6

ende die riuieren sullen verloopen, ende die dijcken, ende dammen sullen cleender worden ende verdorren. Ia dat beyde dat riet ende die biesen verwelcken sullen,

7

ende dat gras aenden wateren verstieuen, ende alle wat gesayt is aenden wateren sal verwelcken ende te niete worden.

8

Ende die visscers sullen trueren, ende alle die gene die een angel int water werpen die sullen clagen.

9

Ende alle die dat net int water werpen die sullen bedroeft sijn. Ende si sullen tot scande comen die goet garen wercken ende netten breyden,

10

Ende die wouwers oft viuers hebben met alle den genen die grachten om loon maken, die sullen alle bedroeft sijn.

11

Die princen tot Zoan sijn dwasen, die wijse raetsheeren Pharaons sijn inden raet sotten geworden Wat segt ghi doch van Pharao? ⁺ Ick ben een kindt der wijsen, ende ic ben van oude coningen gesproten,

+ C vers 11

12

waer sijn dan nv dijne wijsen? Laet haer v vercondigen ende bethoonen, wat die HEERE der heyrscharen ouer Egypten besloten heeft.

13

Maer dye vorsten van Zoan sijn sotten geworden. Die vorsten tot Noph sijn bedrogen. Si verleyden Egypten metten hoecsteen haers stams.

14

Want die HERE heeft eenen draeyenden geest onder haer wtgestort, also dat si Egypten verleyden, in alle hare wercken,, ghelijc een dronckaert tuymelt als hy braect.

15

Ende Egypten en sal nyemanden hebben dye hooft ende steert, ⁺ tack oft spruyte op voeden mach.

+ D vers 15

16

Tot dier tijt sullen die Egiptenaers sijn als wiuen die haer verueren oft versagen. Want de HERE Sebaoth sal die hant ouer haer weysteren.

17

Ende Egipten sal verbaest wesen voor tlant van Iuda, also dat so wie ooc desseluen ghedenct, die sal daer voor veruaert sijn ouer den raet des HEREN Sebaoth, den welcken hi ouer haer besloten heeft.

18

In die selue tijt sullen vijf steden inden landen Egypti spreken die sprake Canaan ende sweren byden HERE Sebaoth. ⁺

+ ephe. ij. Acto. x. mat. viij

19

Die eene sal heeten Irheres. Ter seluer tijt sal des HEREN Sebaoths outaer midden in Egipten lant sijn, ende een litteeken oft marc des HEREN aen die palen,

20

welcke een ghetuygenisse ende teeken sijn sal den HERE Sebaoth inden lande Egypti.

21

Want si sullen totten HEERE roepen ouer diese verdrucken, so sal hi haer seynden eenen behoudere ende meestere diese verlosse, Want dye HERE sal den Egyptenaers bekent worden. Ende die Egiptenaers sullen den HERE kennen tot dier tijt, ende si sullen hem dienen met offer ende spijsoffer.

22

Ende si sullen den HERE gheloften gelouen, ende si sullent houden. Ende die HERE sal die Egyptenaers plagen, ende gesont maken. Want si sullen haer bekeeren totten HEERE, Ende hi sal hem verbidden laten, ende haer gesont maken.

23

In die selue tijt sal een gemeyn passagie zijn, van Egypten in Assyrien, also dat dye Egiptenaers in Assirien, Ende die Assiriers in Egipten comen sullen. Ende die Egiptenaers metten Assiriers Gode sullen dienen,

24

Totter seluer tijt sal Israel die derde sijn met Assiria ende Egipten, door die seegeninge die opter aerden sijn sal,

25

Want die HERE Sebaoth salse ghebenedien, ende seggen. Gebenedijt bistu Egipte mijn volc, ende du Assur mijnder handen werc. Ende du Israhel mijn erfdeele.