Den Bybel met groter neersticheyt ghecorrigeert (Liesveltbijbel 1542)

Van die straffinghe ende plaghe Babilons, Dume, ende Arabie.

Dat .xxi. Capittel

1

⁺DIt is den last ouer die woestine aenden meyre. Ghelijck wanneer een onweder vanden suyden coemt, dwelck al om keert, dat wt der woestijne comet, wt eenen veruaerlijcken lande.

+ A vers 1

2

Want my is een swaer ghesicht geopenbaert. Deene bespotter coemt tegen den anderen, Deene verstoorer tegen den anderen, Trect op Elam, Maday, belegghet haer. Ic wil van alle sijn suchten een eynde maken,

3

Daeromme sijn mijne lendenen vol iammers. Ende ancxte heeft mi omuangen gelijc als eender vrouwen die inden arbeyt gaet. Ic ben versaecht als ic dat hoorde, ende verscricte als ict sach,

4

Mijn herte beeft, grouwel heeft mi verslagen. Ic en hadde gheen ruste inden ghansschen nacht daer van.

5

Ia decket dye tafel. Laet waecken op die hoede. Eet, drinct. Maect v op ghi vorsten. Smeert den schilt.

6

Want die HERE seyt tot mi also. Ghaet hen stelt een wachter diet sie, ende aenschouwe,

7

Ende hi siet reysegaers, rijden ende varen, op paerden, ezelen ende kemelen. ⁺ Ende hi hadde met grooter neersticheydt een aendacht daer op?

+ Hier. li. apo xiiij

8

Ende eenen leeuwe riep HEERE ic sta op die wachte den geheelen nacht,

9

Ende siet daer coemt een, die vaert op eenen wagen, die antwoordet ende spreect, Babel is geuallen, Si is gheuallen ende alle die beelden haerder afgoden, sijn ter aerden neder geuallen,

10

O mijnen lieuen dorschuloer, daer ic op dorsche, So wat ic ghehoort hebbe vanden HEERE Sebaoth, den God Israels dat vercondighe ick v

11

Dit is den last ouer Duma, Men roept tot mi wt Seyr, Wachter, is den nacht schier gheleden? Wachter is den nacht schier gheleden?

12

Die wachter

[p. *]

antwoorde. Al coemt den morghen stont aen. Het sal nochtans weder nacht worden. Ende of ghi al vraecht so sult ghi doch weder comen, ende weder vragen

13

Dit is den last ouer Arabia, Ghi sult int woudt wonen in Arabia, opten wege tot Dedanim,

14

Brenget den dorstigen water teghen, ghi dye daer woonest inden lande Thema, Biedet den vluchtigen broot.

15

Want si vlieden voor tsweert. Ia voor tbloot sweert, voor den gespannen boge, voor den groten strijt.

16

Want also spreect die HERE tot mi. Noch ouer een iaer, gelijc als des dachloners iaren sijn, dan sal alle heerlijcheyt van Kedar onder gaen.

17

Ende die ouerbleuene schutters tot Kedar, van dien sal daer weynich sijn. Want die HERE God Israels heuet geseyt.