Den Bybel met groter neersticheyt ghecorrigeert (Liesveltbijbel 1542)

Van die straffinghe Leuiathans, Ende van die goedertierenheyt Gods, van die verlossinghe Israels, ende roepinge der heydenen.

Dat .xxvij. Capitta

1

⁺MEr ter seluer tijt sal die HERE versoecken met sinen groten harden ^a swaerde, beyde die Leuiathans, deene een slechte oft onuerwinnelike slange, ende den Leuiathan die een seer cromme slanghe is, Ende hi sal die draecken ende waluisscen inder zee verworghen,

+ A vers 1

a Door tsweerdt des heren wort verstaen den toren ende gramscap des eewigen oordeels Psal. vij d. esai. i.d.

2

Inder seluer tijt salmen singen vanden wijngaert des besten wijns,

3

Ic die HERE behoede hem, ende make hem vochtich in corter stont, op datmen sine bladeren niet en gemisse, ic wil hem dach ende nacht behoeden

4

Bi mi en is geenen toorne, wie wil mi door strijdt oft bedwanc tot bremen ende doornen dringen, also dat yemant seggen mach, Ic wil hen vertreden ende gansch verbernen?

5

Oft wie sal mine stercheit houden (dat si seggen can) Men sal mi nochtans vrede laten, vrede salmen mi nochtans laten

6

Het sal nochtans daer toe comen dat Iacob weder wortelen sal, ende Israel groeyen ende wasscen sal, dat si ooc dat aertrijc veruullen sal met vruchten,

7

⁺Hi en wort nochtans niet geslagen, also hem sine vyanden geslagen hebben Ende hi en wort niet gedoot, so hem sine vyanden gedoot hebben,

+ B vers 7

8

Maer metter maten richt ghijse, ende laetse losch, wanneer ghise bedroeft hebt, met dijnen rouwen wint, te weten metten oosten wint,

9

Daerom wort daer door die sonde Iacobs versoent, ende dat is profijt daer af, dat sine sonden wech ghenomen worden, in dien dat hi alle die outaer steenen maken sal, gelijc als gruis gestoten totten asschen, Ia dat ooc gheen bosschen noch beelden meer en sullen blijuen

10

Want de vaste stadt moet eenlijck worden, ende die schoone huysen neder gestoten, ende verlaten werden ghelijc als een woestenije, Ia dat ooc die runderen aldaer weyden ende rusten moghen, ende daer dye rijsers af eten,

11

haer tacken sullen van dorheyt breken, dat die wijuen comen sullen ende daer mede vier maken, Want het is een onuerstandich vol,

12

Ende daerom en sal hy haerder niet ontfermen diese gemaect heeft, ende diese gescapen heeft, en sal haerder niet genadich sijn

13

Tot dier tijt sal die HERE werpen vanden oeuer des waters, tot aen die beke Egypti, Ende haer kinderen van Israel sullen daer vergadert worden deen na dander,

14

Ter seluer tijt salmen met eender groter basunen blasen, dan sullen comen die inden lande Assur vergaen sijn, ende die verstroyde inden lande Egipti, ende sullen den HERE aenbeden opten heyligen berch tot Ierusalem