Den Bybel met groter neersticheyt ghecorrigeert (Liesveltbijbel 1542)

Eenen troost ende belofte met bedecte woorden op die roepinghe der heydenen luydende

Dat .xxxv. Capittel

1

⁺DIe ^a woestine ende eenelicheyt sal lustich ende blide sijn, ende dat velt sal vrolick sijn, ende het sal bloeyen gelijc een lelie,

+ A vers 1

a Woestinen, beteekent hier dye heydenen, die doeter tijt zonder gratie ende scrift waren psal. c.vi d. Deu. xx.

2

si sal bloeyen ende vrolijc staen in alderley lusticheyt ende blijschappe. Want die heerlicheyt van Libano is haer gegeuen, die schoonte Charmels ende Scharons sien die heerlicheyt des HEREN, die maiesteyt onses Godes,

3

Strect die moede handen, ende verpeystert die struyckelende knyen.

4

Segget den versaechden herten weest goets moets, ende en weest niet verslaghen, siet, uwe God die comt totter wrake, God die daer betaelt, die coemt, ende die sal v helpen,

5

als dan sullen der blinden ooghen op ghedaen worden. Ende der doouen ooren sullen gheopent worden,

6

dan sullen die cruepelen loopen ghelijc als een herte, ende die tonge der stommen sal lof segghen, ⁺ wandt daer sullen wateren inder woestine hier ende daer vloeyen ende stroomen inden velden,

+ D vers 6

7

ende so waer te voren drooch-

[p. *]

te geweest is, daer sullen water gangen sijn, ende daert dorre geweest is, daer sullen fonteynaderen sijn, daer te voren die slangen geleghen hebben, daer sal hoy, riet, ende biesen staen.

8

Ende aldaer sal een heyrbane ende passagie sijn, die welcke eenen heyligen wech genoemt sal worden, om dat geen onreyne daer op ghaen en sal Ende die selue sal voor haer sijn, op datmen daer op gae, ende dat die onwetende niet en moghen dolen.

9

⁺Ende daer en sal geen leeuwe sijn, ende daer en sal geen verscorende beeste op gaen, noch aldaer geuonden worden, mer men salder vry ende seker gaen,

+ C vers 9

10

ende die vercochte des HEREN sullen weder comen, ende met iuychgen tot Sion. Die eewige vruechde sal op haer hooft zijn bliscappe ende genoechte sal bi haer sijn, ende smerte ende suchten die sullen wech genomen worden.