Den Bybel met groter neersticheyt ghecorrigeert (Liesveltbijbel 1542)

¶ Van die verachtinghe ende verstoringe der beelden. Ende van dye machte des warachtigen Gods.

Dat .xlvi. Capittel.

1

⁺HOort my ghy dye vanden huyse Iacobs sijt. Ende ghi ouerghebleuene vanden huysghesinne Israels. ⁺

+ A vers 1

+ Hie. L.

2

Ia ghi ooc die ^a inden lichame noch gedraghen wort ende in der moeder liggeste.

a Dye inden lichaem gedragen worden sijn die gene dye God bewaert int verborgen sijns raet Iob xxviij. esa. xl.f

3

Ia ick wil v dragen tot in dat ouderdom, ende tot dat ghi grijsch wort Ic wilt doen. Ic wil v heffen, draghen, ende verlossen Na wien wilt ghi mi scilderen?

4

Ende na wyen conterfeyt ghi mi dan? Tegen wien meet ghi mi, dien ic gelijc sijn mach?

5

Si scudden dat gout wten buydel, ende wegen dat siluer metter wage, ende si lonen den goutsmit, dat hy eenen God daer af make, voor den welcken si knielen mogen, ende aenbeden.

6

Si heffen hem op die scouderen, ende dragen hem, ende setten hem op sijn stede.

Daer staet hi, ende en coemt van sijnder plaetse niet

[p. *]

Roept yemant hem aen, so en antwoort hi niet, noch en helpt hem wt sijnder noot niet.

7

Ghedenct doch sulcx, ende weest sterc, o ghi ouertreders, gaet in uwe herten, Gedenct der voorledenen van outs herwaerts,

8

⁺Want ic ben God, ende geen meer. Een God, wiens gelijc nergens en is,

+ B vers 8

9

Ic dye te voren vercondige, dat namaels geschieden sal, Ende te voren eer dattet coemt, ende segge. Mijn voornemen dat blijft, ende ic doe al dat mi ghenuecht.

10

Ick roepe eenen vogel vanden opganc der sonnen, ende eenen man wt verren landen, die volbrengt, soo wat ic voorneme So haest als ict segge, so volbrenge ict. So gheringhe als ict ghedencke, so doe ict ooc.