Den Bybel met groter neersticheyt ghecorrigeert (Liesveltbijbel 1542)

[p. *]

Hier beghnit die Propheet Hieremia.

[afbeelding]

Na die verclaringhe der coningen ende des tijts inden t tel begrepen, so bewijst die Propheet hoe hi geroepen ende wtgesonden is

Dat .I. Capittel.

1

⁺DIt sijn die geschiedenissen ende predikingen Ieremie des soons Hilkie des priesters, ⁺ een van dien, die tot Anathot inden lande Beniamin woonden,

+ A vers 1

+ iiij.Reg. xxij.

2

als dye HERE eerstwerf met hem ghesproken heeft, inden tijt Iosie des soons Amon des Conincx Iuda, inden .xiij. iare sijns conincrijcx.

3

Ende duerde ooc totten tijden Ioakim des conincx, ⁺ des soons Iosie, des conincx Iuda. Ende tot dat die elf iaren Zedekie des soons Iosie des conincx Iuda veruult waren als Hierusalem ingenomen wert inder vijfster maent

+ iiij.Reg xxv

4

Ende dat woort des HEREN geschiede tot mi, ende sprac,

5

eer ic v in des moeders lichaem bereyde, so kende ick v, ende ick heb v geheylicht, eer ghi vander moeder gheboren waertste, ende heb v tot eenen propheet ghesedt ende vercoren onder veel volcken

6

Ende ic seyde och HERE HERE, ick en dooch niet om te prediken, want ic ben noch te ionc.

7

Doen antwoorde mi die HERE En segt niet ick ben een kint Want ghi sult gaen, so werwaerts ic v seynde, ende prediken, al dat ic v beuele,

8

en weest van haer niet veruaert, ⁺ want ic ben met v, dat ic v verlosse, spreect die HERE.

+ B vers 8

9

Ende die HERE stack sijn handt wt, ende roerde mijnen mont, ende seyde tot mi, siet, ick gheue mijne woorden in dijnen mont, ⁺

+ Het predick ambacht dat gaet bouen al, want het straft ende troost

10

siet, ic sette v heden op desen dach ouer volckeren ende conincrijcken, op dat ghi wtroedet, in stucken breect, verderft, ende vernielt, ende dat ghi sticht ende plant

11

Ende dat woordt des HEREN gesciede tot my, ende sprac Ieremia, wat sietstu? Ic seyde, Ick sie een wacker roede.

12

Ende die HERE seyde tot mi. Ghy heb te recht ghesien, wandt ick wil wacker sijn ouer mijn woort, dat ict doe

[afbeelding]

13

Ende dat woort des HEREN gheschiede anderwerf tot mi, ende seyde, wat sietstu? Ic seyde, ic sie eenen heetsiedende pot vanden Noorden herwaerts.

14

Ende die HERE seyde tot mi. Vanden Noorden sal dat ongeluc comen ouer alle die inden lande wonen.

15

Want siet ic wil roepen alle vorsten inden conincrijcken Noortwaerts, seyt die HERE. Ende si sullen comen, ende haer stoelen setten voor die poorten te Hierusalem, ende rontom die mueren henen, ende voor alle die steden Iuda,

16

ende ic wil dat oordeel ouer haer laten ghaen, om alle haerder boosheits wille, datse mi verlaten, ende wieroocken anderen goden, ende dat si aenbidden dwerc haerder handen

17

Daerom gordet dijne lendenen, ende maect v op, ende prediket haer, al dat ic v beuele, en weest niet versaecht van haer, want ic en wilt niet dat ghy v veruaert,

18

want ick wil v heden maecken tot een vaste stadt, ende tot een yseren pilaerne, tot eenen metalen muere, inden gansschen lande, tegen die coningen Iuda, ende tegen haer Vorsten, tegen haer priesters, ende tegen dat volc inden lande.

19

Also ooc, al streden si alle tsamen tegen di, ⁺ so en sullen si nochtans v niet verwinnen want ic ben bi v seyt die HERE, dat ic v verlosse.

+ C vers 19

20

Ende dat woort des HEREN ghesciede tot mi, ende seyde.

21

Gaet henen, ende predict openbaerlic te Hierusalem, ende segt. Also spreect die HERE, ic ben ghedachtich der weldaet die v in dijnder iuechden gheschiede, ende der liefden die ic v bewees, doen ghi noch schoon waert, doen ghi mi volchde in die woestine inden lande daermen niet en zaeyt,

22

doen Israel den HERE geheylicht wert, ende sijn eerste vrucht, Alle die Israhel aten (oft verslonden) die sondichden, ende ongeluc quam ouer haer, seyt die HERE