Den Bybel met groter neersticheyt ghecorrigeert (Liesveltbijbel 1542)

¶ Hi waerschout dat volc, dat si den heydenschen insettingen niet aen en hanghen, Ende bewijst hoe ydel dat is beelden te maken ende die te eeren in die stede des warachtighen leuendighen Gods.

Dat .x. Capittel

1

⁺HOort dat woort des HEREN dat hy tot v spreect, O ghi huys Israels,

+ A vers 1

2

Also seyt die HERE, Ghi en sult der heydenen wijse niet leeren, Ende ghi en sult v niet verscricken van die teekenen des hemels, gelijc als die heydenen haer vreesen, Want der heydenen Goden en sijn niet dan ydelheit,

3

Si houwen int wout eenen boome, ⁺ ende dye werckmeester maectse metter bijlen,

+ ie. xlvij

4

ende hi ouertrecse met siluere, ende gout, ende hi maectse vast aen met naghelen ende hameren, op dat si niet om en vallen.

5

Het en sijn anders niet dan pilaernen ouertoghen, Si en connen niet spreken, Men moetse ooc dragen, want si en connen nyet gaen, Daeromme en sult ghi voor haer niet vreesen Want si en connen noch helpen noch schade doen.

Maer die HEERE en is nyemanden ghelijc,

6

Ghi sijt groot, ende dijnen name is groot, ende ghi contet metter daet bewijsen.

7

⁺Wie en soude v niet ontsien Welcke coninc der heydenen en soude v niet gehoorsaem sijn? Want onder alle die wijsen ende heydenen ende in alle conincrijcken en is dijns nyemant ghelijcke,

+ B vers 7

8

Si sijn altemael narren ende dooren, Wandt een hout moet ymmer eenen ydelen Godsdienst sijn,

9

dye silueren platen brengtmen van opten meyr herwaerts, ende tgout van Vphas door den meester ende goutsmit toe bereet. Geele side ende purpur (oft schaerlaken) trectmen haer aen, Ende also is dat werc aller haerder

[p. *]

wijsen, deen metten anderen.

10

Maer die HERE is een gerechte God, een leuendige God, een eewige coninc, Van sinen thoorne beeft dat aertrijc ende die heydenen ende connen sijn dreygen nyet verdragen.

11

Daerom segt nv tot haer also, Dye Goden die den hemel ende die aerde niet ghemaect en hebben die moeten vander aerden onder den hemel vernielt worden.

12

Mer hi heeft dat aertrijcke door sijn cracht gemaect ende des werelts omganck bereet door sine wijsheyt, ende den hemel wtghebreet door sine verstant.

13

⁺Wanneer hi sijn stemme hooren laet (oft dondert) so coemt daer een groot water te samen onder den hemel, inder lucht, ende trect den neuel op vanden eynde der aerden, Hi maect den ^a blixem inden regen, Ende hy doet den wint comen wt heymelijcke plaetsen.

+ C vers 13

a blixem inden reghen keeren, dat is seer doen verscricken, ende daer na sterckelic vertroosten. Psal. C.xxxiiij.b.

14

Alle menschen sijn narren met haerder const, Ende alle beeltgieters bliuen bescaemt met haren beelden, Want hare Godekens ende beelden sijn ydel bedroch, ende si en hebben geen leuen.

15

Die ydele werckmeesters selfs ende haer werck, dat si in ydelheit gemaect hebben sullen tsamen vergaen, als si versocht sullen worden.

16

¶ Mer also en is hi niet die Iacobs scat is, Mer hi is de ghene diet al gescapen heeft. Ende Israel is sijn erfdeel, Sinen name is die HERE der heyrscaren.

17

¶ Doet dijne neeringe (ende scande) wech wt den lande, ghi die noch wonet in die vaste steden.

18

Want alsoo seyt die HERE, Siet, ic wil die inwoners des lants, teenenmael verstooten, ende rontom sollen, dat sijt voelen sullen.

19

Ach mijns iammers ende hertsen leedts, mer ic dencke tis mijn plage, Ic moet lijden,

20

⁺Mijn tente is verwoest, ende alle mijn zeelen sijn gebroken, Mijne kinderen sijn wech, ende daer en is niet meer ghebleuen, Nyemant en richt mijn tenten weder op, ende mijn boeyen en slaet nyemant weder op,

+ D vers 20

21

Want dye Herders sijn narren geworden, ende si en vraechden na den HERE niet Daerom en connen si ooc niet rechts geleeren, Maer si verstroyen die cudden.

22

Siet daer comt een gecrijsch herwaerts, ende een groot beuen wt den lande vandt Noorden, dwelcke die steden Iuda verwoesten sal, Ende tot wooninghen der draecken worden sullen.

23

Ic weet O HERE dat des menschen doen in sijnder macht niet en staet. ⁺ Ende ten staet ooc in niemants vermoghen sine weghen te leyden, sine screden oft ganghen te richten.

+ Ghebet

24

Daeromme castijt my, O HERE, nochtans in ghenaden ende niet in dijnen grimmighen toorne, op dat ghi mi niet geheele te niet en maect,

25

Mer stort dijnen grimmighen toorne wt ouer die Heydenen, die v niet en kennen, ende ouer die volcken, die dijnen name niet aen en roepen, ⁺ Wandt si hebben Iacob opgegeten ende verslonden, si hebben hem te nyet ghemaect, ende sijn wooninghe verwoest.

+ nu. xiiij