Den Bybel met groter neersticheyt ghecorrigeert (Liesveltbijbel 1542)

¶ Dye propheet dreyghet dat volck wt Gods beuele, in dyen si haer nyet en beteren so wil hy den tempel doen ghelijck Sylo Daeromme wert hy gheuanghen vanden priesters, ende valscen propheten. Nochtans wert hy na langhen tijdt weder los door Ahikam

Dat .xxvi. Capittel.

1

⁺INden beghinne des Coninckrijcx Ioakim des soons Iosia des Coninckx Iuda gheschiede dit woordt vanden HEERE, ende sprack.

+ A vers 1

2

Also spreect dye HERE ghaet inden voorhof des huys des HEREN, ende predict allen steden Iuda die daer in gaen, om aen te beden inden huyse des HEEREN, alle dye woorden dye ic v beuolen hebbe, haer te seggen, en doet daer nyet af,

3

oft si misschien hooren wouden ende haer bekeerden, een yeghelijck van sinen boosen weghen, op dat my oock berouwe des onghelucx, dat ick voorghenomen hebbe te volbrenghen, om haerder boosen voornemen wille.

4

Ende segt tot haer, Alsoo seyt dye HERE, Ist sake dat ghy my nyedt ghehoorsaem en zijdt, dat ghy in mijne wet niedt en wandelt, die ic v gegeuen hebbe,

5

dat ghy niet en hoort die woorden mijnder knechten der propheten, dye ick dagelijcx tot v gesonden heb. Ende in dyen ghy nochtans nyet hooren en wilt.

6

So wil ic met desen huyse doen gelijck met Silo. Ende dese stadt tot eenen vloec allen heydenen opter aerden maken.

7

Doen nv dye priesters, dye propheten, ende alle dat volck Hieremiam hoorden, dat hi sulcke woorden sprac inden huyse des HEREN.

8

Ende als Ieremias wt ghesproken hadde, alle dat hem dye HEERE beuolen hadde, te segghen den volcke, doen grepen hem dye Priesters ende Propheten, ende dat ghansche volck ende seyden.

9

Du moest steruen, Waeromme dorfstu inden name des HEREN prediken ende segghen, het sal desen huyse gaen, gelijck als Silo? Ende dese stadt sal so woest worden dat daer nyemandt meer inne woonen en sal Ende dat ganssce volc versaemde hem inden huyse des HEREN teghen Hieremiam.

10

Doen sulcx hoorden dye vorsten Iuda, ghinghen si wt des conincx huyse op, int huys des HEREN ende setten haer voor dye nyeuwe poorte des HEREN,

11

Ende dye Priesters ende propheten spraken voor den vorsten ende allen den volcke. Dese man is des doots schuldich. Want hy heeft gepredict teghen dese stadt gelijc ghi met uwen ooren selfs gehoort hebt.

12

Doen sprac Hieremias tot allen den vorsten ende tot allen den volcke. Dye HERE heeft my gesonden, dat ic sulcx alle dat ghy gehoort hebt, soude prediken tegen dit huys, ende teghen dese stadt.

13

⁺Daeromme soo betert nv uwe wegen, ende voornemen, ende zijdt gehoorsaem der stemmen des HEREN dijns Gods, so salt den HERE ooc berouwen des oeuels dat hy tegen v voorgenomen hadde.

+ B vers 13

14

Syet, Ic ben in uwen handen Ghy moghet met my doen, dat v belieft.

15

Nochtans sult ghy dat weten. In dyen ghy my doodet, soo sult ghy, ende dese stadt, ende alle haere borgers, des ontsculdigen bloets schuldich maken. Wandt voorwaer die HEERE heeft mi tot v lieden gesonden, dat ick sulcx al voor uwen ooren spreken soude.

16

Doen spraken dye vorsten ende dat ganssche volc totten priesteren ende propheten. Dese man en is des doots niet schuldich. Wandt hy heeft inden name des HEREN ons Gods ghepredict.

17

Daer stonden oock op sommige die ouerste (oft raedtsheeren) des lants, ende spraken totten ghanschen hoope des volcx.

18

Ter tijdt Hiskia des coninckx Iuda, was een prophete Micheas van Maresa, ende sprac totten ganschen volcke Iuda. Alsoe spreect dye HERE der heyrscharen, Sion sal omgekeert worden gelijc eenen acker diemen eert (oft ploeget) Ende Hierusalem sal tot eenen steenhoope worden. Ende den berch des huys des HEREN, tot eenen wilden woude.

19

Nochtans en liet hem Hiskias dye coninck Iuda, ende dat ganssche volck Iuda, daeromme nyedt dooden. Iae si vreesden veel meer den HERE, ende aenbaden voor dat aensicht des HEREN, doen beroudet ooc den HERE dat oeuel, dat hi voorgenomen hadde Daeromme doen wi zeer qualijcken, teghen onse sielen Doen was daer een die sprack.

20

⁺Also was daer oock een propheet dye den name des HEREN predicte, Vrias, een sone Semeia van Kiriath Iearim, dese predicte oock teghen dese stadt ende dit lant, gelijc als Hieremias,

+ C vers 20

21

4 Ende doen die coninck Ioakim ende alle sine gewaldighe, ende dye vorsten sine woorden ghehoort hadden, so woude hem die coninc laten dooden. Doen dat Vrias merckte, soe vreesde hy, ende vloot, ende tooch in Egipten.

22

Doen sandt die Coninck Ioakim knechten in Egypten, ElNathan den sone Achbor, ende sommighe ander met hem,

23

dye brochten Vriam wt Egypten, ende brochten hem totten Coninck Ioakim, dye liet hem metten sweerde richten Ende hy dede zijn doode lichaem worpen in dye grauen des ghemeynen volcx.

24

Also holp Ahikam die sone Saphan den Hieremiam, dat hi den volcke niedt in die handen en quam dat si hem dooden.