Den Bybel met groter neersticheyt ghecorrigeert (Liesveltbijbel 1542)

¶ Die prekinghe teghen die Ammoniten.

Dat .xlix. Capittel.

1

⁺TEghen dye kinderen Ammon spreeckt dye HEERE alsoo, En heeft Israhel gheen kinderen? oft ist erueloos? Waerom besidt dan Malchon dat lant Gad? zijn volck woondt in sine steden?

+ A vers 1

2

Daerom siet, die tijdt coemt seyt die HEERE dat ick wil een crijsch gheschrey laten clinken, ouer Rabbath, der kinderen Ammon, dat si sal op eenen hoope woest ligghen. Ende haer dochteren (oft steden) sullen metten viere aenghesteken worden, Mer Israel sal dye ghene besitten vanden welcken hi beseten was seyt die HERE.

3

O Hesbon huylt, Want Ai is verdoruen, Screyt O ghi dochteren Rabbath ende trect sacken aen, claecht ende loopt op dye mueren rontomme, Want Malchon wort gheuanghen ende wech gheuoert, met sinen priesteren ende Vorsten.

4

Waeromme verlaet ghi v op dijne beemden? Dijne weyden zijn verdroocht, O du ongehoorsame dochter, ghy die v op uwe schatten verlaet ende segt in dijnder herten Wye is so cloeck dye my derre ghenaken.

Syet, spreect dye HERE God der heyrscharen

5

Ick wil een verscricken ouer v laten comen, van allen dye rontsom v woonachtich zijn, op dat een yeghelic voor hem selfs verstroyt worde, ende datter nyemant en si dye dye vluchtighe vergadere,

6

Maer daer na wil ick wederomme keeren dye gheuanghenisse der kinderen Ammon seyt die HERE.

Also seyt die HERE der heyrscharen, tegen Edom

7

En isser dan gheen wijsheyt meer tot Theman? En isser dan geen raedt meer byden kinderen?

8

Is haer wijsheyt gansch wt? Vliedt, went v, ende cruypt, ende verbercht v in dye diepte, O ghy borghers tot Dedan. Want ick laedt een ongeluc ouer Esau comen, ende den tijt zijnder besoeckinghen.

9

Daer sullen wijnpluckers ouer v comen, dye v gheen nalesen van druyuen en sullen achterlaten. Ende daer sullen dieuen des nachts ouer v comen, die sullen haer genoech stelen,

10

Want ick hebbe Esau bloot ghemaect, ende sijn heymelijcke plaetse ontdect, ⁺ also dat hi hem niet ghedecken en can. Sijn zaedt, sijn broeders, ende sijn naghebueren sijn verstoort, dat haerder niet een meer te vinden en is

+ B vers 10

11

Nochtans so wat datter ouer blijft van dijne weeskens, dien wil ic dat leuen gonnen, Ende dijne weduwen sullen op my verhopen.

12

Want also spreeckt die HERE. Siet, die ghene diet niet verdient en hadden, den kelc te drincken die moesten hem drincken, Ende soudt ghi ongestraft bliuen? Ghi en sult onghestraft niet blijuen, Maer ghi moet ooc drincken,

13

Want ic hebbe bi my selfs gesworen, spreect die HERE, dat Bozra tot eenen wonder, versmaedtheydt woestijne, ende vermaledidinge worden sal, Ende alle haer steden een eewige woestheyt.

14

Ick hebbe vanden HERE ghehoort, datter een bootscappe onder die Heydenen gheseyndt is. Versaemt v ende coemt herwaerts, teghen haer, bereedt v totten strijde,

15

Want siet ick hebbe v cleene ghemaect onder die Heydenen ende veracht onder den menschen.

16

Dijnen tort, ende dijns herten hoochmoedt heeft v bedroghen, Want ghi die in steenclippen woont, ende hooge berghen in hebt, Al waer dijnen neste so hooch als des Adelaers, soo wil ick nochtans v daer af ter neder stooten spreect die HERE.

17

Edom sal so verwoest worden, dat alle dye daer voorby gaen, haer verwonderen sullen, ende pijpen, ouer alle hare plaghen,

18

Ghelijck als Zodoma ende Gomorra met haeren naeghebueren omghekeerdt

[p. *]

zijn, ⁺ spreect dye HERE, also dat oock nyemandt aldaer woonen, noch gheene mensche daer in logeren en sal.

+ Abdie. f Ge. xix

19

Wandt siet, Hy coemt herwaerts op, ghelijck eenen leeuwe, van dye stoute Iordane heyr, teghen dye vaste hutten (oft schaeps koyen) Wandt ick wil hem derwaerts haestelijcken laten loopen. Ende wie weet, wie dye ionghelinc is? dyen ic teghen haer ten strijde bereyde? Wandt wie is mijns ghelijcke? Wie wil mi meesteren? Ende wye is dye herder dye mi wederstaen can.

20

Daeromme hoort nv den raedt des HEREN, dien hy ouer Edom heeft, ende sine ghedachten dye hi ouer dye inwoonders in Theman heeft, Wat geldet? oft hare Herders knapen haer nyedt ter aerden slichten en sullen? ende haer wooninghe verstroyen?

21

Also oock dattet aertrijck beuen sal wanneer dattet met malcanderen vallen sal, ende haer ghecrijsch salmen aen dat roode meyr hooren.

22

Siet, hi vliecht her op, ghelijck eenen aernt, ende hy sal sine vloghelen wt spreyen ouer Bozra. Ter seluer tijdt sal dat herte der stercken (oft Ruesen) in Edom zijn ghestelt, ghelijck dat herte eender vrouwen int kints noode.

23

Hemath ende Arphad staen iammerlijck, Si zijn versaecht, want si hooren eenen quaden roep.

24

Dye aender zee woonen, dye zijn also verscrict datse gheen ruste ghehebben en connen.

25

Damascus is versaecht, ende gheeft dye vlucht, Sy tapert, ende is in ancx, ende smerte ghelijc een vrouwe int kints noode?

26

Hoe? en is si nv niet verlaten? dye vermaerde ende sorgeloose stadt Daeromme sullen haer ionge mans persoonen op hare straten ter neder ligghen, ende alle hare crijschlieden ondergaen ter seluer tijt, seyt dye HERE der heyrscharen,

27

Ende ick wil die mueren tot Damasco met vier aensteken, dattet die palleysen Benhadad verslinden sal.

28

⁺Teghen Kedar ende dye conincrijcken Hazor, welcke NebucadNezar dye coninck tot Babel versloech, seyt dye HEERE alsoo. Wel op, Trect op in Kedar, ende verstoordt dye kinderen teghen den Oosten

+ D vers 28

29

Men sal haer, hare tenten ende cudden nemen, hare boeyen, ende alle hare ghereetschap, ende kemelen sullen si wech voeren. Ende men sal veruaerlijcken ouer haer roepen op alle siden.

30

Vliet, ende schiet v ter stont weg, Cruypt, ende sluypt in die holen, O ghi inwoonders tot Hazor seyt die HERE, Want NebucadNezar Die Coninc tot Babel heeft wat inden sinne, tegen v, ende hy meent v,

31

Wel op, trect hier op, teghen een volc dat rijck is, ende sonder sorghe woont, seyt dye HERE, dye noch poorten, noch grendelen en hebben, ende en woonen nyedt by malcanderen.

32

Hare kemelen sullen gherooft, ende dye menichte haerder beesten genomen worden, ende ick wilse verstroyen tegen alle winden, dye inden winckelen wonen, ende van allen plaetsen herwaerts wil ic haer ongheluc ouer haer laten comen seyt dye HERE,

33

also dat Hazor sal tot eender draken wooninge worden ende een eewige woestijne, datter nyemant en woone, ende geen mensche aldaer zijn wooninghe hebben en sal

34

Dit is dat woordt des HEREN ⁺ dwelck totten propheet Hieremiam gheschiede teghen Elam inden beghinne des conincrijcx Zedekie des Coninckx Iuda, ende sprack.

+ iij.re. xi

35

Also seyt die HERE der heyrscharen. Siet, ic wil den boghe Elam in stucken breken, haer principaelste cracht,

36

ende ick wil dye vier winden wt die vier eynden des hemels, ouer haer laten comen, ende ic wilse in alle dye selue winden verstroyen, datter ooc gheen volck zijn en sal derwaerts dye verdreuen wt Elam, nyet comen en sullen,

37

Ende ick wil Elam versaecht maken voor hare vyanden, ende den ghenen, dye haer na haren leuen staen, ende ongheluck ouer haer laten comen met mijnen grammigen toorne, spreect dye HERE. Ende ick wil haer metten sweerde veruolghen, tot dat ickse te nyete make.

38

Mijnen stoel wil ick in Elam setten, ⁺ ende wil beede den coninck ende die Vorsten aldaer vernielen, seyt dye HERE, Maer in toecomender tijt wil ick dye gheuanghenisse Elam wederomme keeren seyt die HEERE.

+ Deut. ij.