Den Bybel met groter neersticheyt ghecorrigeert (Liesveltbijbel 1542)

¶ Die plaghe oft straffinghe teghen Moab.

Dat .xlviij. Capittel.

1

⁺TEghen Moab spreect dye HERE der heyrscaren dye God Israels also. Wee der stadt Nebo, want si is verwoest, ende leget allendelijck. Die vaste stede Kyriathaim is gewonnen, si staet allendelijck, ende is verscoort.

+ A vers 1

2

Den tort oft creytinge van Moab is ghedaen, dien si tegen Hesbon hadden, Want men gedenct wat quaets teghen haer. Te weten, Coemt, wi willense wtroeyen, Ia datse ooc gheen volc meer en zijn. Ende du Madmen moet ooc verdoruen worden, dat sweert sal v veruolghen.

3

Men hoort een gheroep van Horonaim, ende verstooringhe ende groot iammer,

4

Moab is verslagen, men hoort hare iongen schreyen,

5

Want si gaen met weeninge den wech op, tot Lubith, ende die vianden hooren een iammer gescrey, den wech van Horonaim af, Te weten. Schict v wech, ende salueert v leuen.

6

Maer ghi sult zijn, gelijc als een cudde inder woestijnen.

7

Om dies wille dat ghi v op dijne vasticheden verlaet, ende op dijne scatten, sult ghi oock ghewonnen worden, ende Chamos moet henen wt gheuangen wech trecken, met sine priesteren ende Vorsten,

8

Want die vernielder sal comen ouer alle steden, also dat ooc een stadt nyet ontulieden en sal. Dye dalen sullen verdoruen, ende dat effen verwoest worden,

9

Want die HERE heuet geseydt

Lieue laet doch Moab bloeyen, want si sal noch eens wtghebloeyt hebben, ende hare steden sullen woest liggen, datter ooc nyemant in woonen en sal,

10

Vermaledijt si dye gheene dye des HEREN werck onachtsaemlick doet. Veruloect si die ghene, die zijn sweerdt ophout, datter gheen bloet en storte.

11

⁺Moab is van zijnder iuechden op, sonder sorghen gheweest, ende heeft op sijn heffe oft ghifte stille ghelegen, Ende hi en is niet wt van dat een vat int ander vergoten, ende niet inder geuangenissen getogen geweest Daerom is hem ooc sinen smake ghebleuen, ende sinen ruecke en is niet verandert gheworden.

+ B vers 11

12

Daeromme siet dye tijt comt seydt dye HERE, dat ick haer sal seynden wijnverlaters, die haren wijn verlaten sullen, ende hare vaten aflaten, ende dye hare flesschen ruysschen, ende tot puluere van een slaen sullen.

13

Ende Moab sal van Chamos gheschent worden, ghelijc als dat huys Israels van Bethel gheschent is, Waer op dat si haer verlieten.

14

Waeromme derfstu segghen? Wy zijn Ruesen, ende dye rechte crijschlieden?

15

als doch Moab moet verwoest, ende haer steden verbernt worden, ende hare beste ionghe gheselle moeten daer af ter slachbanck gaen, spreect dye Coninck, dye daer heet dye HERE der heyrscharen.

16

Want dat ongeual van Moab sal corts comen, ende haer ongheluc haest seer,

17

Liene hebt doch medelijden met haer, Ghi luyden die rontomme haer wonet, ende haren name kent, ende spreeckt. Och hoe is die heerlijcke roede ende dyen stercken staf ghebroken?

18

Ende du dochter Dibon climt af van dijnder heerlicheyt, ende stelt v inder dorheit, Want dye verdestrueerder Moab sal tot v comen, ende uwe vesten in stucken breken.

19

Trect op dye straten (ende siet, O du inwoonersse Aroer. Vraget den ghenen, dye daer ontulieden ende ontloopen, ende segt. Hoe ist daer vergaen,

20

Ach Moab is verwoest ende verdoruen. Huylt ende schreyt, ende vertellet tot Arnon, dat Moab verwoest is.

21

Dye straffinghe is oock ouer dat effen landt ghegaen. Te weten, ouer Kolon, ende IahezaMephaath,

22

Didon ouer Nebo, ende ouer dat huys Diblathaaim

23

KirIathaim, ende Beth Gamul, Beth Meon, Kirioth,

24

⁺Botzra, ende ouer alle die steden inden lande Moab, si liggen verre oft na bi.

+ C vers 24

25

Den hoorn Moab is afgehouwen, ende haren arme is ghebroken seyt die HERE.

26

Maectse droncken, Want si heeft haer bouen den HERE verheuen, dat si hare handen tsamen wringe, op datse ooc tot eenen spot worde,

27

Wandt Israel heeft uwen spot moeten sijn, recht als oft hy onder die dieuen gheuonden ware. Ende want ghi sulcx teghen Israel ghesproken hebt, so sult ghi ooc wech moeten

[p. *]

28

O ghi inwooners in Moab verlaet die steden, ende woondt inden steenrootsen, ende doet ghelijck als dye duyuen, die daer inden hoogen gaten nestelen.

29

Men heeft altijt gheseydt vanden stouten Moab, dat hi seer stoudt is, houaerdich, grootmoedich, tortachtich, ende pompues.

30

Maer die HERE seydt. Ick kenne sinen toorne wel, dat hi so veel niedt en vermach, Ende hi vermeedt hem meer te doen, dan sijn vermoghen is.

31

Daeromme moet ick ouer Moab huylen, ende ouer dat ganssche Moab schreyen, Ende ouer dye luyden tot Kir Heres clagen,

32

Ick moet ouer v Iaeser ghi wijngaert tot Sibna weenen, want dijn wijnrancken zijn ouer dat meyr gheuaren, ende tot aent meyre Iaeser toe ghecomen Dye verwoester is in dijnen oogste ende wijnlesen gheuallen.

33

Dye vruechde ende dye ghenuechte is wt dijn veldt wech, ende wt den lande Moab, ende men en sal gheenen wijn meer inder wijnperssen treden, Die wijnpersser en sal nyedt meer sijn liet singhen.

34

Van des roepens weghen van Hesbon, al tot Eleale toe, dwelcke tot Iazha toe ooc clincke, Van Zoar aen, tot Horonaim toe, der drieiarigher koe toe. Want oock dye wateren Nimrim sullen versipen (ende verdroogen)

35

Ende ick wil spreeckt dye HEERE, daer mede Moab een eynde maken, also dat si niet meer op die hoochten en offeren, noch haren Goden wieroocken en sullen.

36

Daeromme climt mijn herte ouer Moab, gelijck een trompette, dye een truerliet pijpt, Ende ouer die luyden tot KirHeres truert mijn herte, ghelijck een pijpe dye een claechliet pijpt, Want si hebben bouen haer vermoghen gedaen. Daeromme moeten si te gronde gaen.

37

Alle hoofden sullen kael zijn, ende alle baerden afgescoren, alle handen in twee gecrabt, ende een yegelijck sal sacken aentrecken.

38

Op alle daken ende straten ouer al in Moab salmen clagen, Want ick hebbe Moab, in stucken gebroken, ghelijck als een ongeacht vat, spreect die HEERE,

39

Och hoe is si verdoruen? Hoe huylen si? Hoe schandelijcken hangen haer dye hoofden? Ende Moab is tot eenen spot, ende een verscricken gheworden, ende alle die rontomme haer woonen.

40

⁺Want also spreect dye HERE, Siet hi vlieghet daer henen als een aernt, ende hi spreyt dye vloghelen wt ouer Moab.

+ D vers 40

41

Kiriath is ghewonnen, ende die vaste steden zijn inghenomen, ende dat herte der stercker in Moab, sal tot dyer tijt zijn, gelijck eender vrouwen herte in kints noode,

42

Wandt Moab moet verwoest worden, also datse geen volck meer en zijn. Daerom dattet hem teghen den HERE verheuen heeft.

43

O du inwooner Moab vreese, kuylen, ende stric, comen ouer v, spreect dye HERE.

44

So wie der vreesen ontloopt die sal inden kuyle vallen. Ende die wt die kuyle comt, die sal inden strick gheuanghen worden, Want ick wil ouer Moab laten comen een iaer haerder versoeckinghen seyt die HERE.

45

Die wten strijt ontloopeen, dye sullen tot Hesbon een toeulucht soecken, Maer daer sal een vier wt Hesbon, ende een vlamme wt Sihon gaen, ende een vuer wt Hesbon, dat welcke die plecken in Moab ende die crijschlieden verteren sullen

46

Wee dijns O Moab, Dat volck Chamos is verloren, Want men heeft dijne sonen ende dochteren ghenomen, ende heeftse geuangen wech geuoert.

47

Maer inden toecomenden tijdt, wil ic noch dye gheuangenisse Moab omkeeren seydt dye HERE. Dits geseyt vander straffinge (oft ordeel) ouer Moab