Den Bybel met groter neersticheyt ghecorrigeert (Liesveltbijbel 1542)

¶ Die prekinghe teghen dye Philisteen, Tyrum, Sydon, Basan, Ascalon, ende dye ander eylanden.

Dat .xlvij. Capittel.

1

⁺DIt is dwoort des HEREN dat totten Propheet Hieremiam ghesciede, teghen die Philisteen, eer dat Pharao Gazan sloech.

+ A vers 1

2

Also spreect dye HERE. Siet daer sullen wateren vanden Noorden her op comen, die sullen eenen vloet maken, die beyde dat lant, ende so wat daer in is, die steden ende die inwoonders wech sal veruloeyen ende verschoren, Ia dat dye menschen sullen schreyen,

3

ende die inwoonders des lants huylen voor dat gheruchte des drauens der stercker peerden (oft reysegaeres) voor dat ratelen haerder waghens, ende dat kerren haerder raderen. Dye vaders en sullen niet na haren kinderen omsien, so versaecht sullen si werden voor den dach die daer coemt verderuen allen dye Palestijnen, ende wt te roeyen, Tyron ende Sydon, met haren anderen hulpers.

⁺ Want die HERE sal die Palestinen, ende die Eylanden Caphthor verwoesten,

+ B vers 3

4

Gaza sal kael worden ende Ascalon met die ouerghebleuene in haren dalen sal verdestrueert worden. O du sweert des HEREN, hoe langhe wilt ghi oorloghen?

5

Wanneer wilt ghi doch ophouden? keerdt doch weder in dijn scheede, rust, ende weest stille.

6

Maer hoe cont ghi dat ophouden, aengesien dye HERE v beuel ghegheuen heeft tegen Ascalon ende v tegen die meyrsteden verwect heeft.