Den Bybel met groter neersticheyt ghecorrigeert (Liesveltbijbel 1542)

¶ Dit sijn die tranen oft claghen Hieremie.

[afbeelding]

Dat. I. Capittel.

1

Aleph ACh hoe leghet die stadt so woeste, dye wel eer vol volcx was, Sy is ghelijck een wedewe Die een princersse onder die Heydenen, ende een Coninghinne onder alle landen was, die moet nv onder tribuyt sitten.

2

Beth Si weent des nachts, dat haer die tranen ouer die kinnebacken ouerloopen, Daer en is nyemant onder allen haren vrienden diese troostede. Iae oock allen hare naesten verachten haer, ende sijn hare vyanden gheworden.

3

Gimel Iuda is geuangen in allendicheyt, ende sware dienstbaerheit. Si woont onder die heydenen ende en vint geen ruste. Alle haer veruolgers handelen seer fellijcken.

4

Daleth Die straten tot Sion liggen woest, om datter nyemant meer totten hoochtijdelijcken feesten en coemt. Alle haer poorten staen woest, haer Priesters suchten. Hare ioncfrouwen sien iammerlijcken, ende si is seer bedroeft.

5

He Hare wederpartijders drijuen opwaerts ende het gaet haren vyanden wel. Want dye HERE heeftse vol iammers ghemaect, om haerder grooter sonden wille. Haer kinderen sijn gheuanghen voor den vyant henen wech geuoert.

6

Vau Der dochter Sion is alle haer cieraet wech, Hare vorsten sijn gelijc rammen die geen weyde en vinden, ende sijn mat voor den drijuer henen gegaen.

7

Sdain Hierusalem gedenct op dese tijt, hoe ellendich ende verlaten dat si is, ende daer bi hoe veel goets dat si in voorleden tijden gehadt heeft. Want alle haer volc leget daer neder onder die vyanden, ende datter nyemant en is, die haer helpe. Haer vyanden sien haren lust aen haer, ende bespotten hare Sabbathen.

8

Heth Hierusalem heeft haer besondicht, daeromme moetse sijn ghelijc als een onreyn wijf. Alle dyese in eeren hielden, die verachtense nv. Wandt si hare schaemte gesien hebben. Maer si sucht ende gaet te gronde.

9

Thet Haren soom is beulect. Si en hadde niedt eens ghedacht, dattet haer alsoo soude ten laetsten gaen. Sy is ymmer seer grouwelijcken hier onder gestooten. Ende daer toe en heeftse nyemant diese trooste. Ia ooc en spreectse niet eens. Ach HERE aensiet mijn ellendicheyc, Want die vyandt nemet vast toe.

[p. *]

10

Iod Die vyandt heeft sijn hant aen alle haer cleenodien geslaghen. Ende dat heeft si moeten aensien dat die heydenen in hare heylichdom ghinghen den welcken ghi verboden haddest, datsi onder v ghemeynten niet en souden comen.

11

Caph Alle hare volc suchtet, ende soect broot. Soo wat si costelicx hadden, dat gauen si om spise, op dat si byden leuen mochten blijuen. Ach HERE scout ende aensiet doch hoe ghansch snoode dat ic geworden ben,

12

Lamed O ghi alle die hier voorbi gaet, schout, ende aensiet ofter ooc erghens een smerte si, ghelijck als die mijne, die mi also verteert. Wandt die HERE heeft mi so veel iammers gemaect, inden dage sijns grammighen thoorns.

13

Men Hi heeft een vier wt der hoochte in minen beenen ghesent, ende hi heeft dat selue laten rasen, Mijnen voeten heeft hi een net gestelt ende heeft mi te rugge geworpen Hi heeft mi tot eender woeste gemaect, also dat ic alle dage trueren moet.

14

Num Mijn sware sonden sijn door sine straffinge ontwect, ende met hoopen mi op den hals gecomen, dat mi alle mijn cracht vergaet. Dye HERE heeft mi also toebereyt, dat ic niet en can opgecomen.

15

Samech Die HERE heeft betreden alle mijne stercten die ic had. Hi heeft een feest ouer mi laten wtroepen, om mijne ionge mannen te verslaen. Die HERE heeft der ioncfrouwen die dochter Iuda eene wijnpersse laten treden.

16

Ain Daeromme weene ic also, ende mijn oogen vloeyen met water, om dat die vertrooster die mijn siele soude vermaken, verre van mi is. Mijne kinderen sijn wech. Want die vyant heeft die ouerhant gecregen.

17

Pe Syon werpt haer handen van een, ende daer en is nyemant diese trooste, Want dye HEERE heeft den vyanden rontomme Iacob geboden te liggen, also dat Hierusalem moet onder haer sijn ghelijc een onreyn wijf.

18

Zade Die HERE is gerecht, want ic hebbe sinen monde ongehoorsaem geweest. Hoort alle volcken, ende aenschout mijne smerten. Mijn ionghe maechden ende ionghe ghesellen sijn inder geuangenissen wech geleyt.

19

Cof Ic aenriep mine boelen, mer si hebben mi bedrogen. Mijne priesteren ende raetsheeren inder stadt, mer si sijn versmacht, doen si om broodt gingen, om haer siele te lauen

20

Res Ach HERE siet doch hoe bange dat mi is, datter mi in mijnen lijue wee van doet, mijn herte keert hem omme in mijnen lijue. Want ic ben grotelic bedroeft. Van buyten slaet mi tsweert, ende van binnen heeft mi de doot eender weduwen gelijc gemaect.

21

Schin Men hooret wel dat ic suchte, mer nochtans en heb ic gheenen trooster Alle mijn vyanden hooren mijn ongeluc, ende si hebben haer verblijt, want ghi hebbet gedaen. Daeromme laet doch den dach comen, in dien ghi wtroepen latet dattet haer gaen sal, gelijc als mi.

22

Tau Laet doch alle haer boosheit voor v comen. Ende bereetse toe gelijc ghi mi om mijnder misdaets willen toeghericht hebt. Want mijns suchtens is veel ende mijn hert is bedroeft.