Den Bybel met groter neersticheyt ghecorrigeert (Liesveltbijbel 1542)

Dat .v. Capittel.

1

⁺ACh HERE ghedenct doch hoe dattet ons gaet, Siet, ende aenschout onse versmaetheyt,

+ A vers 1

2

Onse erffenisse is den vreemden te deel geworden, ende onse huysen den wtlandighen.

3

Wy sijn weesen, ende en hebben gheen vaders, onse moeders sitten als die weduwen.

4

Onse eyghen water moeten wi om ghelt drincken. Onse hout moeten wi om ghelt coopen.

5

Men iaecht ons opten hals na, Ende als wi al moede sijn, soo en laetmen ons nochtans gheen ruste hebben.

6

Wy hebben ons moeten Egipten ende Assirien ouergheuen, op dat wy doch broots ghenoech souden hebben te eten.

7

Onse vooruaders hebben ghesondicht, ⁺ ende si en sijn nv niet meer tegenwoordich, ende wy moeten hare misdaet ontgelden.

+ Ex. xx. Deu. v. Hiere. xxxi. ezechie. xviij.

8

Die knechten regneren ouer ons. Ende daer en is nyemandt, die ons van haerder hant verlosse.

9

Wi moeten ons broot met pericule ons leuens halen voor dat sweert inder woestijne.

10

Onse huydt is al waerse in eenen ouen verbrant vanden grouwelijcken hongher.

11

⁺Si hebben die wijuen tot Syon ghescheyndt, ende die ionghe maechden in die steden Iuda,

+ B vers 11

12

Die vorsten sijn van haer ghehanghen, ende die persoonen der ouder eerbaren en heeftmen ooc niet ghespaert.

13

Die ionghelinghen hebben moeten molensteenen draghen, ende dye knechtkens hebben ouer thout dragen moeten struyckelen.

14

Die ouden en sitten niet meer onder die poorte, Ende die ionghelinghen en bedrijuen gheen musijcspel meer,

15

Ons herten vruechde heeft een eynde,

16

ons danssen ende reyen is in droefheyt verkeert. Den cranse ons hoofts is verwelct ende afgheuallen, O wee ons dat wi ye so ghesondicht hebben.

17

Daeromme is ooc ons herte bedroeft, ende onse ooghen sien iammerlijcken,

18

om des berges Sions wille, dat hi so woest leyt dat ooc die vosschen daer op rontsomme loopen.

19

Maer du O HERE die inder eewicheydt blijft ende dijnen throone altijt ende eewelijc,

20

Waeromme wilt ghi onser so gheheel vergheten? ende ons so langhen tijt verlaten?

21

O HERE bekeert ons tot v, so worden wi bekeert. Vernieut onse dagen gelijc van oudts herwaerts,

22

want ghi hebt ons nv lange ghenoech verworpen, ende sijt langhe ghenoech ouer ons toornich gheweest.