Den Bybel met groter neersticheyt ghecorrigeert (Liesveltbijbel 1542)

¶ Noch breeder van die straffinge Egipti.

Dat .xxx. Capittel.

1

⁺ENde des HEREN woort geschiedede tot my, ende sprac Du menschen kint, Predict, ende segt,

+ A vers 1

2

Also spreeckt dye HERE God, Huylt ende segt, O wee des daechs want den dach is hier,

3

Ia den dach des Heeren is hier, Dyen duysteren dach. Den tijt is hier, dat die Heydenen comen sullen,

4

ende dat sweert sal ouer Egipten gaen, ende Morenlant moet hem verslaen als die verslagen in Egipten vallen sullen, ende haer volck wech geuoert ende hare fundamenten omgheworpen sullen worden,

5

Morenlant ende Lidia, ende Lybia, met alle dat gemeen volck ende Cub, ende alle dye met haer int verbont, oft wten beloofden lande zijn. Dye sullen met haer doort sweerdt verghaen.

6

Alsoo spreeckt die HERE, Die beschermheeren Egypti moeten vallen, ende dye houaerdije haerder macht moet hier onder, Vanden thoorne Zyene aen sullen si met den sweerde verslagen worden, seyt dye HEERE God,

7

Ende si sullen ghelijc hare woeste palen oock woest worden, Ende hare steden onder die andere verwoeste steden, oock woest liggen op dat si leeren, dat ic dye HERE si,

8

Als ick een vier in Egipten make, alsoe dat alle dye haer helpen verderft werden,

9

Ter seluer tijdt sullen ambassaten in schepen van my wt trecken, Die Moren te veruaren dye nv so sekerlick sonder sorghe zijn, Ende haer sal een vreese aencomen, gelijck der Egiptenaers, doen haren tijdt quam. ⁺ Want siet Hi coemt certeynlijcken.

+ B vers 9

10

Also spreect dye HERE God, Ic wil die menichte in Egipten wtroyen, door NebucadNezar den Coninc tot Babel,

11

Want hi ende sijn volck met hem, met die Tyrannen der heydenen, dye zijn al hier ghebracht, om dat lant te verderuen, Ende si sullen haer sweerden wt trecken teghen Egipten, op dat dat lant ouer al vol verslaghene ligghe,

12

Ende ick wil dye waterstroomen drooghe maken, ende dat lant boosen luden vercoopen ende wil dat landt, ende so wat daer in is door dye vreemde verwoesten, Ic die HERE hebt gesproken.

13

Also spreect dye HERE God, ⁺ Ic wil dye Goykens tot Noph wtroeyen, Ende die beelden ganssch vernielen, ende Egipten en sal gheenen Vorste meer hebben, Ende ick wil in Egipten lant een vreese seynden,

+ Noph is Menphis oft AlkairenNo dat is Alexandria.

14

Ic wil Patros woest maken, Ende een vier tot Zoan aensteken, Ende dat recht oft oordeel ouer No laten gaen

15

Ende ick wil mijn gramscappe wtstorten ouer ⁺ Sin, welcke der Egiptenaren stercte is. Ende wil dye menichte tot No wtroyen,

+ Sin dat is Peluisium.

16

Ende wil een vier in Egipten aenstesten, ende Sin sal angst ende bangicheyt hebben, Ende No sal ter aerden gheslichtet, ende Noph daghelickx benaut worden,

17

die ionghe mannen tot ⁺ On ende Bubasto, dye sullen metten sweerde verslaghen, Ende dye wijuen wech geuoert worden.

+ On dat is Heliopolis of Thebis

18

Taphnis sal eenen duysteren dach hebben als ick dat Ioc ende septer Egypti breken sal, ende dat die houaerdie haerder macht daer in een eynde sal hebben. Sy sal met wolcken bedeckt worden, ende hare dochteren sullen geuangen wech geuoert worden.

19

Ende ick wil dat oordeel ouer Egipten laten gaen, op dat si weten dat ic die HERE si.

20

Ende het geschyede inden elfsten iare opten seuenden dach der eerster maent, ⁺ dat des HEREN woort tot my gheschiede, ende sprac.

+ C vers 20

21

Du mensche kint. Ick wil den arm Pharaons des Egypschen Coninckx in tween breken, Ende siet, Hi en sal niet verbonden worden, op dat hi heelen mochte, Gheen plaester noch doecken en sullen hem daer oock niet ouer gebonden worden, dat hy sterc worde, ende een sweert vatten conde.

22

Daerom spreect die HERE God also, Siet Ick wil Pharao den coninck tot Egypten aen, ende wil sinen arme in stucken breken, beide den stercken, ende den gebroken, alsoo dat hem dat sweerdt wt sijnder handt ontuallen moet,

23

Ende wil die Egiptenaers onder die Heydenen verstroyen, ende in dye landen veriaghen,

24

Mer den arme des Conincx tot Babel dien wil ick stercken, ende hem mijn sweert in sine hant gheuen Ende ic wil den arme Pharaons breken, also dat hy voor hem stenen sal, ghelijck een dye ter doot toe ghewont is,

25

Ia ic wil dye armen des Conincx tot Babel sterc maken, also dat die armen Pharaons ter neder sincken sullen, op dat si bekennen dat ick dye HERE si,

26

Als ick mijn sweert den Babiloonschen Coninc in die handt gheue, op dat hijt ouer Egipten wt trecke,, ende ick die Egiptenaers onder die Heydenen verstroeye, ende in die landen veriaghe, dat si weten dat ic die HERE ben.