Den Bybel met groter neersticheyt ghecorrigeert (Liesveltbijbel 1542)

¶ Hi straft ende bekijft die priesters, Propheten ende alle ouersten des volcx, Ende bescrijft oock, onder die ghelijckenisse eens herders, dat officie eens ghetrouwen ende ongetrouwen herders.

Dat .xxxiiij. Capittel.

1

⁺ENde des HEREN woordt gheschiede tot mi, ende sprac,

+ A vers 1

2

Du menschen kint, Propheteert tegen die herders Israels, propheteert, ende segt tot haer. Alsoo spreect die HEERE God, Wee den herders Israels, die haer seluen weyden, En souden die Herders dat vee niet weyden ende voeden?

3

Mer ghi eet dat vette, Ende cleet v metter wolle, Ende slaet doot dat gemeste, Mer die schapen en wilt ghi niet weyden,

4

Die swacke en wacht ghi niet, Ende die crancke en gheneset ghi niet, Dat gewont is en verbint ghy niet, Dat verdoolde en haelt ghi niet wederomme, Ende dat verloren en soect ghi niet, Mer strengelic ende rouwelic heerscapt ghi ouer haer,

5

Ende mijn scapen zijn verstroyt, als die gheenen Herder en hebben, Ende si sijn alle den wilden beesten tot eender spijse geworden, ende gansch verstroyt,

6

Ende si gaen dolen herwaerts ende ghins op die bergen, ende op die hooge houelen, ende zijn op den ganschen lande verstroyt, Ende daer en is niemant die na haer vrage oft haerder gaey slae

7

Daeromme O ghi herders hoort des HEREN woort,

8

So waerlick als ick leue spreect die HERE God, Aengesien dat ghi mijn schapen laet tot eenen roof ende mijn cudde allen wilden beesten tot eender spijse worden, want si gheenen herder en hebben, ende mijne herders na mijne scapen niet en vragen, Mer si sijn sulcke herders die haer seluen weyden, ende mijne scapen en willen si nyet weyden.

9

Daeromme O ghi herders hoort des HEEREN woort, Also spreect dye HERE God,

10

Siet, ic wil aen die herders, ende wil mijn scapen van haren handen eysschen, ende ic wil met haer een eynde maken, also dat si niet meer en sullen herders sijn, ende en sullen haer seluen niet meer weyden. Ick wil mijne schapen wt haren muyle verlossen, alsoo dat si die voortaen niet meer verslinden en sullen.

11

⁺† Want also spreect die HERE God, Siet, ick wil mijne schapen selfs gaey slaen, ende die soecken, ghelijc als een Herder sine scapen soect,

+ B vers 11

12

als si van sijnder cudde verdoolt sijn, Also wil ic ooc mijne schapen soecken, ende wilse verlossen van alle plaetsen, derwaerts si verstroyt waren, ter tijt doent duystere ende neuelachtich was,

13

Ic wilse van alle volcken hier wt brengen, ende wt alle landen versamen, ende wilse in haer lant brengen, ende wilse weyden op die berghen Israels, ende in alle beemden, ende plaetsen des lants,

14

Ick wilse op dye beste weyde brengen, ende haer koeyen sullen op die hooge bergen in Israel staen, aldaer sullen si in saechte stallen liggen, ende een vette weyde hebben op die berghen Israels.

15

Ic wil selfs mijn scapen weyden, spreect die HERE God,

16

ende ic wilse daer neder doen ligghen, Ick wil dat verloren was weder soecken, ende dat verdoolde weder brengen, Ende dat gewont verbinden, ende die crancke stercken ende waernemen, ende so wat vet ende sterc is, dat wil ic bewaren, ende ick wilse voesteren, ghelijc als si des van doen hebben.

17

Maer tot v O mijne schapen spreect die HERE God also, siet, ic wil oordeelen tusschen scaep ende scaep, ende tusschen rammen ende bocken,

18

En duncket v niet ghenoech sijn, dat ghi so goede weyde hebt? ende soo oueruloedich, dat ghi dat ouerghebleuen met voeten treet? En wast v niet genoech dat ghi so oueruloedich dat clare water dronct? moest ghi ooc dat ouerblijft omroeren ende onclaer maken?

19

also dat mijne scapen eten moesten, dat ghy met uwe voeten vertreden hadt? ende drincken so wat ghi met uwen voeten onclaer gemaect hadt? *

20

⁺Daeromme spreect die HERE God also tot haer, Siet, ic wil oordeelen tusschen die vette ende mager schapen,

+ C vers 20

21

Daeromme dat ghi die crancke schapen in dye side ende schouderen stietet, ende metten hoornen tot haer in voert, tot dat ghise alle van v verstroyde,

22

ende ick wil mijne schapen helpen, dat si niet meer tot eenen roof en sullen worden, ende ic wil een vonnisse wijsen tusschen dat een schaep ende dat andere,

23

Ende ic wil haer eenen eenigen Herder verwecken, diese weyden sal, te weten, mijnen knecht ⁺ Dauid, die salse weyden, ende hi sal haer Herder sijn,

+ Dauid is Christus.

24

Ende ick die HERE wil haer God sijn, Mer mijn knecht Dauid, sal haer vorste sijn, dat segghe ic die HERE.

25

Ende ic wil een verbont met haer maken ende alle boose dieren wt den lande veriagen, also dat si sonder sorghe woonen sullen in die woestijne, ende in dye wildernissen slapen,

26

Ic wil haer, ende alle die rontsomme mijn houelen sijn, seegenen, ende op haer laten reghenen ter rechter bequamer tijt, dattet genadige reghenen sullen sijn,

27

also dat die boomen opten velde hare vruchten brenghen, ende dat lant sinen wasch gheuen sal, ende si sullen sonder vreese opten lande woonen, Ende si sullen bekennen, dat ic die HERE ben, Als ic haer iock ghebroken ende haer verlost hebbe vander hant der geenre, dyen si dienen moesten,

28

Ende si en sullen den heydenen nyet meer tot eenen roof worden, Ende geen beeste en salse verslinden, mer si sullen sekerliken woonen, sonder alle vreese.

29

Ende ic wil een vermaerde plante verwecken, dat si geenen honger meer lijden en sullen inden lande, Ende en sullen haer versmaetheyt niet meer dragen onder dye heydenen, Ende si sullen weten, dat ic die HEERE haer God bi haer ben, Ende dat si vanden huyse Israels mijn volck sijn, seyt die HERE God,

30

Ia ghi menschen sult dye cudde oft schapen mijnder weyden sijn, Ende ic wil uwe God sijn spreect die HERE God.