Den Bybel met groter neersticheyt ghecorrigeert (Liesveltbijbel 1542)

¶ Hi berispt die Edomiten die die kinderen Israels quelden, ende hateden.

Dat .xxxv. Capittel.

1

⁺ENde dat woort des HEREN gheschiede tot my, ende sprack,

+ A vers 1

2

Du menschen kint, Stelt v aensicht tegen dat gheberchte Seir, ende propheteert tegen haer, ende spreect tot den seluen.

3

Alsoo spreect dye HERE God, Siet, ick wil v aen O geberchte Seir, ende mijn hant tegen v wtstrecken, ende ic wil v gansch woest maken,

4

Ic wil dine steden eensaem maken, also dat ghi sult een woestijne worden, ende weten dat ick die HERE ben,

5

Daeromme dat ghy altijt der kinderen Israels vyanden sijt, Ende ghi iaechtse int sweert, alst haer

[p. *]

gaet, ende dat hare sonden ghestraft worden.

6

Daeromme so waerlic als ick leue, spreect die HERE God, wil ic v ooc bebloet maken, ende ghi en sult den bloede niet ontulieden, om dat ghi soo bloetghierich sijt, so en sult ghi den bloede niet ontloopen,

7

Ende ic wil den berch Seir woest, ende eensaem maken, datter niemant op wandelen noch gaen en sal,

8

Ende wil sijn gheberchte, ende alle houelen, dalen, ende alle beemden vol dooder maken,

9

dat ooc niemant in dijne steden woonen en sal, Ende si sullen weten, dat ic die HERE si.

10

Ende daeromme dat ghi segt, Dese beyde volcken met haren landen moeten mijn worden, ⁺ ende wi willense in nemen, Hoe wel die HERE aldaer woont,

+ B vers 10

11

Daeromme, so waerlic als ic leue spreect die HERE God, wil ic na dijnen thoorne ende hate met v ommegaen, ghelijc ghi met haer omghegaen hebt wt rechten hate, Ende ic wil by haer bekent worden, als ick v ghestraft hebbe,

12

Ende ghi sult bekennen dat ick die HERE alle dijn torten gehoort hebbe, die ghi tegen dat geberchte Israels ghesproken hebt, ende gheseydt, Ehe, Hoe sijnse verwoest, ende ons te verderuen ghegeuen?

13

Ende ghi hebt v tegen mi beroemt, ende stoute woorden teghen my wtghestooten, die ick alle ghehoort hebbe.

14

Daeromme spreect die HERE God also, Want ghi v ouer al in dijnen lande verblijt hebt, daeromme wil ic v tot eender woestijne maken. Ende gelijc ghi O berch Seir v verblijde, ende meynde dat huys Israels in te nemen,

15

om dattet woest was worden, effen alsoo wil ic met v doen, also dat den berch Seir woest worden sal, met dat ganssche Edom, ende sullen weten dat ic die HERE ben.