Den Bybel met groter neersticheyt ghecorrigeert (Liesveltbijbel 1542)

¶ Hier wort van Christo ende den Euangelio te kennen ghegheuen om dat onder die heydenen ende Ioden te prediken, welcker hooft ende Coninck Christus is, ende die verstootinghe der Ioden wort verhaelt, waer si haer niet en beteren, ende die verkiesinghe der Heydenen in haerder plaetse.

Dat .ij. Capittel

1

⁺AL waer dat ghetal der kinderen Israhels ghelijc dat sandt aender zee, datmen noch ghemeten, noch ghetellen en can, So salt nochtans gheschieden, datmen in dye plaetse, daermen tot haer seyt, Ghy en sijt mijn volck niedt segghen sal, O ghi kinderen des leuenden Gods,

+ A vers 1

2

Wandt dye kinderen Iuda, ende die kinderen Israels sullen te hoope comen, Ende si sullen haer tsamen aen een hooft houden, ende wten lande opwaerts trecken, Want den dach Iesraels sal eenen grooten dach sijn

3

Segt uwen broederen, dat si mijn volc sijn, Ende tot uwe susteren, ⁺ dat si in ghenaden sijn,

+ Hie. iij.

4

Straft nochtans uwe ^a moeder, Want si en is mijn wijf niet, Ende ic en wilse niet hebben, Soo en ben ick oock haer man nyedt, Mer beueelt haer, datse hare hoererie wech doe, ende haer ouerspeelderie van haren borsten aflegge,

a moeder dat is die Synagoge der Ioden

5

op dat ickse niet naect wt en trecke, ende haer bloot en stelle ghelijc si was, doen si geboren wert. Ende dat ickse niet en make, gelijc een woestijne, ende ghelijc een dorre lant, ende dat icse nyet van dorste en late steruen,

6

ende haerder kinderen niet en ontferme. Want si sijn hoeren kinderen,

7

Ende haer moeder is een hoere. Ende dyese gedragen heeft die is tot scanden comen, Ende spreect Ic wil mijne boelen na loopen, die geuen mi mijn broodt, mijn water, mijn wolle, mijn valssche, olye, ende mijnen dranck.

8

⁺Daeromme siet ic wil dijnen wech met doornen toe maken, ende eenen tuyn oft haghe daer voor setten dat sijt niet vinden en sal)

+ B vers 8

9

Ende als si hare boeleerders na loopt, dat si die niet en grijpe, Ende als si die soect dat sise niedt en vinde, Ende dan segghen moet, Ic wil wederomme tot mijnen voorgaenden man gaen, Daert mi beter was, dant nv is

10

Want si en wil niet bekennen dat ict si, die haer coorn, most ende olye gaf, Ende ooc haer veel siluers ende gouts gegeuen hebbe, Waer van si den Baal ghemaeckt hebben

[p. *]

11

Daeromme wil ick mijn coorn, ende moste weder nemen tot sijnder tijt, Ende mijn wolle ende vlassce weder halen, daer mede si haer scamelheit bedecte.

12

Nv wil ic haer scande ontdecken voor die oogen haerder boelen Ende nyemant en salse wt mijnder hant moghen verlossen.

13

Ende ic wil daer een eynde af maken van al haerder vruechden, feesten, Nyeu maenden, Sabbathen, ende alle hare vierdagen,

14

Ic wil hare wijnstocken, ende vijchboomen verwoesten, Aengesien dat si seyt, Dat is mijnen loone, dat mi mijne boeleerders gegeuen hebben. Ic wil een wildernisse daer af maken, dattet de wilde beesten verslinden sullen,

15

Ende also wil ick besoecken die daghen haerder Baalim, oft beelden den welcken si ruecwerc doet, ende si verciert haer met ooren ringen, ende halsbanden, ende loopt haren boelen na, ende vergetet mijnder spreket die HERE.

16

Daeromme siet, ic wilse locken, ende in eender woestinen leyden, ende vriendelijcken toespreken.

17

Aldaer wil ic haer, hare rechte wijngaertackers weder geuen. Ende ooc dat dal Achor daermen prediken sal, het gene dat ghi te hopen hebt. Ende aldaer sal si dan recht singen, gelijc als ter tijt haerder ioncheyt, Doen si wt Egypten lant tooch.

18

Als dan spreect de HERE, sult ghi mi noemen, Mijn man, ende mi niet meer Mijn Baal hieten.

19

Want ic wil die namen der Baalim van haren monde wech doen, datmen der seluer namen nyet meer gedencken en sal.

20

⁺Ende ic wil met haer een verbondt maken, ter seluer tijt, met die wilde beesten, met die voghelen onder den hemele, ende met dat gewormte opter aerden. Ende ic wil die boghen, sweerden ende oorloghe vanden lande wech doen, Ende wilse sonder ^a sorge laten woonen,

+ C vers 20

a Sonder sorge wonen is vri in Cristo sijn, door dat geloue ende in geruster conscientien wezen

21

Ic wil mi aen v verlouen inder eewicheyt. Ic wil mi aen v verlouen in gerechticheyt, ordeele in genade, ende barmherticheyt,

22

Ia in trouwe ende gelooue wil ic mi aen v verlouen, Ende ghi sult den HERE bekennen.

23

Ter seluer tijt wil ick verhooren, spreect die HERE, Ia den hemel wil ic verhooren, Ende den hemel sal dat aertrijc helpen,

24

Ende die aerde dat coorn, most, ende olye helpen. Ende die selue sullen Iesreel helpen,

25

Ic wil haer mi opter aerden tot saet behouden, ende haerder ontfermen, die in ongenaden was, ende seggen tot haer welcke mijn volc niet en was, Du bist mijn volck, Ende dan salt seggen, Du bist mijn God.