Den Bybel met groter neersticheyt ghecorrigeert (Liesveltbijbel 1542)

Hi beclages hem, dat aen haer gheen medecijne en helpt, alsoo seer sijn si gewont in hare misdaden

Dat .vij. Capittel

1

⁺ALs ic begonste Israel te meesteren ende gesont te maken, So openbaerde haer die misdaet Ephraim, ende de boosheit Samarie, Si gaen met luegenen ende ydele dingen om, Sijn si bi huis, so sijn si dieuen, Trecken si wt, so roouen si,

+ A vers 1

2

Si en souden niet geerne bedencken in haerder herten, dat ic alle haer boosheyt gedachtich ben, Want oft si al met hare bose opsetten omuangen worden, So sijn si nochtans voor mi openbaer

3

In haerder luegenen ende schalcheyt heeft hem dye Coninc ende die princen verblijt,

4

Dese sijn alle ouerspeelders, gelijc eenen bachouen, welcken die backer gheheyt heeft, als hi ophout te kneden, tot dattet deech hem heffe, ende opgaet.

5

Huyden gatet also toe, dat onse Coningen, ende Vorsten beginnen vanden wijn te rasen, Si schicken haer totten spotters,

6

Sy sijn met dat opset haerder herten eenen bachouen gelijc, haren slape is den gansschen nacht gelijc een backers slape, smorgens bernt hi ghelijc een vier vlamme,

7

Si sijn altesamen verhit, gelijc eenen bachouen, Hare richters hebben sy verslonden. Alle hare coningen sijn gheuallen, daer en isser niet een, die my aenroept.

8

Daeromme moedt Ephraim onder die heydenen ghemengt worden, Ephraim wort gelijc eenen koecke, diemen niet omme en keert,

9

Dye vreemden verteeren hem sijn cracht, ende hi en nemes niet waer, Dat grijse hayr wast hem, ende hi en wils niedt weten,

10

Mer sinen hoomoet sal hem voor sijn aensicht staen, Wandt si en bekeeren haer niet totten HERE haren God, ⁺ Ende in alle dinghen en soecken si hem niet.

+ B vers 10

11

Ephraim is gelijc een sotte duyue, ⁺ die geen hert en heeft, Si hebben die Egiptenaers aengeroepen, Ende totten Assyriers sijn si getogen,

+ iiij.regum xvi

12

Mer als si henen trecken, so wil ic mijn net ouer haer wtspannen, ende haer gelijc die vogelen die inder locht woonen, neder trecken, Ende na haerder menichte wil icse castijen,

13

Wee haers, want si sijn van mi gheweken. Verderuinge moet haer aen comen, want si hebben mi ouergetreden oft voorby gegaen. Ic was hare verlosser, mer si spraken valscelijcken tegen mi,

14

Si en hebben wter herten tot mi niet geroepen, Mer op haer hebben si ghehuylt, Als si van die vruchten ende den wijn rupsten So weken si van mi af,

15

Ic hebse onderwesen, hare armen heb ick ghestrect, Maer si peysden quaet teghen mi, ⁺

+ ose. ij. xi hie. xliiij. ier. xliij. eze. xiiij.

16

Si sijn te niet geworden, gelijc eenen boge, die daer mist, Hare princen worden metten sweerde verslaghen, van des onbeschaemden gewelts haer-

[p. *]

der tonghen, ⁺ Ende sulcx haer lasterlick spreken, dat hebben si van Egypten ghehaelt.

+ ie. xliiij eze. xiij.