Den Bybel met groter neersticheyt ghecorrigeert (Liesveltbijbel 1542)

¶ Hi bewijst haer boosheyt, Ende vercondicht haer die straffinghe.

Dat .xiij. Capittel

1

⁺DEn grouwel Ephraims is oock in Israel ghecomen, ⁺ Hi is tot Baal ghetreden, Daeromme moet hi steruen,

+ A vers 1

+ Iud. ij. vi. ende xvij

2

Ende nv so sondighen si altijt meer ende meer, Sy maken haer wt haren goede ghegoten beelden, die der Heydenen Godekens ghelijc sijn, Hoe wel dattet anders niet en sijn dan een maecsel der werckmeesters. Ende dan segghen si, dat die

[p. *]

menschen haer sonden offeren, ende die calueren hoochlijcken eeren.

3

Daeromme sullen si worden gelijc een morghen wolcke, ende ghelijc eenen dauwe, die effen vroech vergaet, Ende als een caf dat den draeywint vanden dorschvloer wech waeyt, Ende ghelijc eenen roock die wt der schouwe oft schoorsteen vlieget.

4

Ic ben dijn HERE God, van die tijt aen, dat ic v wt Egypten lant gheleyt hebbe, dat ghi gheenen God dan mi alleen kennen, gheenen ghesontmaker dan my hebben en soudt.

5

Ic hebbe inder woestijnen in dat moeylijcke lant dijnder acht gehadt ende v besorcht.

6

Mer doen icse weyde ende voede dat si versaedt werden, so verhief haer hare herte, ende si vergaten mijnder.

7

Daeromme wil ic haer als een leeuwe sijn, ende gelijc een luypaert op die straten tot Assyrien,

8

Ic wilse aenruysschen ghelijck een beyrinne die van haer iongen berooft is, Ick wil haer hare vertwijfelt herte verschoren, Aldaer wil icse verslinden, Ende als die wilde dieren sullen si verschoort worden.

9

O Israel ghi hebt v selfs verderft, ende te niet gebracht,

10

Want ic ben altijt v helpe gheweest, Waer sijn nv dijne Coninghen, die v in alle dijne steden helpen souden? ⁺ Waer sijn dijne ouerheeren, ende beschermers die v beschudden souden? Want ghi seidet, Geeft ons Coninghen ende Vorsten,

+ B vers 10

11

In mijnen thoorne gaf ic v eenen Coninck, Ende in mijnder gramschappen nam ic hem ooc weder.

12

Dye misdaet Ephraims heeft haer diep versoncken, Ende sijn sonde leyt gansch diep verborgen,

13

Daeromme sullen hem ooc ween aencomen, gelijc eender barender vrouwen, Het is een onwijs sone, om dat hi niet en denct, dat hi in die tijt der gheboorte niet en hadde mogen blijuen,

14

In dien ic hem voor den cuyle niet bewaert en hadde, noch voor den doot beschermt en hadde gehadt. Ic was dijn doot, O doot O helle ic was dijnen strale oft prickel, Mer nv is mi alle mijnen troost ende hope wech.

15

Gelijc als hi nv onder die broederen die heerlicste is, Also sal den Oosten wint die wint des HEREN van die woeste afcomen, Ende sine wateraderen wtdroogen, Ende sijn fonteynaderen versipen, Die sal die schatten alder lustiger vaten roouen ende verderuen,

16

Samaria wort verwoest, want si is Gode ongehoorsaem gheweest, Met den sweerde sullen si verslaghen worden, Hare suyghende kinderen sullen vermorselt, ende haer onbeuruchte vrouwen opghesneden worden.