Den Bybel met groter neersticheyt ghecorrigeert (Liesveltbijbel 1542)

¶ Hi verwijt haer hare ontrouwe ende afual, ende vermaentse tot wederkeeringhe om sijnder weldaden wille.

Dat .xij. Capittel

1

⁺EPhraim weydet den wint, ende volcht den Oosten wint na,

+ A vers 1

2

Altijt en doet hy niet dan logenen, ⁺ ende vermeerdert verderuinghen, Met den Assyriers maken si een verbont, Haren olye wort in Egypten gheuoert.

+ ij.re xvi

3

Dye HERE sal oock int gherecht gaen, met Iuda, ende haer ghelijck Iacob straffen, Nae sine weghen ende voornemen sal hi hem betalen.

4

Hi hadde in moeders lichaem sinen broeder met die verssenen ghegrepen, Ende in sijnder stercte met God gheworstelt,

5

Hi worstelde metten Engel, Ia dat hi hem oock verwan, smeecte ende badt, tot BethEl vant ick hem ende daer sprac ic tot hem,

6

Ia die HEERE God der heyrscharen, Ic die HEERE was sijnder ghedachtich, ⁺ om dat hi hem tot sinen Godt bekeerde, alsoo ooc dat hi dat goede, ende dat gherechte aenhinc, Ende dat hi altijt op sinen Godt verhoopte,

+ Gene. xxxv. xxxij

7

⁺Mer hi is Canaan, in sijnder handt is een ^a valsche waghe, Hy beneersticht om gewelt, ende onrecht te doen.

+ B vers 7

a Valsche waghe, dat is in allen vol bedrochs sijn ende ontrouwe wesen. pro. xi.a

8

Ephraim denct also, Ic ben nochtans rijck, ic ben gheweldich gheworden, In alle mijn wercken ende arbeyt en wort gheen misdaet gheuonden, aenden welcken ick my ontgaen hebbe,

9

Hoe wel dat ick nochtans uwe HERE uwe God ben, Als doen ic v wt Egypten leyde, Ende dat ick bouen dat in dijne tenten sadt, als op die hoochtijdelijcke daghen.

10

Met die Propheten hebbe ick altijt ghesproken, ende mi in menigerley openbaringhen verthoont, Ic hebbe den Propheten gheopenbaert,

11

Mer tot Gilead is Godloosheyt, Sy sijn ydel gheworden. Tot Gilgal hebben si ossen geslagen, Ende also veel steenhoopen als si in die ackeruoren hebben, So vele outaers hebben si ooc,

12

Iacob vloot in Assyrien, Ende Israel diende om een wijf, Ende om een vrouwe hoede hi die beesten.

13

Door eenen Propheet voerde die HERE Israel wt Egypten, ende bewaerde hem door eenen Prophete,

14

Maer Ephraim heeft hem met sijnder wederspannicheyt verthoornt, Om dies wil sal sijn bloet op hem sijn, Ende die HEERE sal hem sijn schande betalen.