Den Bybel met groter neersticheyt ghecorrigeert (Liesveltbijbel 1542)

Hier beghint die Propheet Amos.

¶ Hi vercondicht Israhel sine straffinghen. Ende daer toe oock sommighe Heydenen

Dat .I. Capittel.

1

DIt is dat Amos (dye onder dye herders tot Thekoa een was) ghesien heeft ouer Israhel, inder tijt Vsie des conincx Iuda, ende Ierobeams des soons Ioas, des conincx in Israel, twee iaer voor die aertbeuinghe,

2

⁺ende sprack. Dye HEERE sal wt Sion brullen. ⁺ Ende sijn stemme wt Hierusalem laten hooren, Alsoo dat die schoone weyden der herders iammerlijc staen sullen, ende dat den toppe des berchs Carmel verdorren sal.

+ A vers 2

+ iiij.Reg. xiiij

3

Also spreect die HERE. Om drie ende vier leelicker feyten wil Damasci, en wil ick haerder nyet sparen, ⁺ Daerom dat si Giliad met yseren vleghelen ghedorscht hebben.

+ B vers 3

4

Mer ic wil een vier seynden in dat huys, Hasaeel, dattet die pallaysen Benhadas verslinde.

5

Ende ic wil die grendelen tot Damasco aen stucken breken Ende die inwoners inden velde Auen, met den ghenen dye dat scepter hout wt den lustighen huyse wtroeyen, Also dattet volc in Sijpra tot ⁺ Kir wech gheuoert sal worden, seyt die HERE.

+ Cyrene is Kir

6

Also seyt die HERE. Om drie ende vier lasteringhen wille Gaze, en wil ic haerder niet sparen. Daeromme dat si die geuangen weder gheuangen, ende int lant Edom verdreuen hebben.

7

Maer ick wil een vier binnen der mueren Gaze seynden, dat sal haer palleysen verteren.

8

Ende ic wil die inwoonders tot Asdod, ende den ghenen, die dat scepter hout, tot Askalon wtroeyen. Ende mijn hant tegen Akron wtstrecken, also dattet vergaen sal, soo wat vanden Philisteen ouerghebleuen is, spreect die HERE God.

9

Also spreect die HEERE. Om drie ende vyer boosheden wille, der stadt Sor, en wil ick haerder niet sparen, ⁺ Daeromme dat si die gheuanghen int lant Edom voorder verdreuen hebben. Ende nyet ghedacht en hebben aen dat verbont der broederen.

+ C vers 9

10

Daeromme wil ick een vier onder die mueren Sor seynden, dat hare palleysen verslinden sal

11

Also spreect die HERE. Om drie ende vier scalcheden wille Edom, en wil ic sijnder niedt sparen. Daerom dat hi sine broeders metten sweerde veruolcht ende hem sine kinderen gedoot heeft, ende altijt verschoort in sinen toorne, ende sijn verbolghentheyt sonder ophouden bedreuen heeft.

12

Mer ic wil een vier seynden tot Theman dat sal die palleysen tot Bazra verslinden.

13

Also spreect die HERE, Om drie of vier lasteringhen wille, der kinderen Ammon, en wil ick haerder niet sparen, Daerom dat si die beuruchte in Gilead verschoort hebben, op dat si haer lantpalen breeder maken souden.

14

Mer ic wil een vier onder die mueren Rabba aensteken dat hare palleysen verteeren sal in dat gheroep van Alarme, ter tijt des strijts.

15

Ende als dat onweder comen sal inden dach des storms Daer sal dan haer Coninck met sine princen gheuangen wech geuoert worden seyt die HERE.

Also spreect die HERE. Om drie ende vier scalcheden wille Moabs, en wil ick haer niedt sparen, Daeromme dat si dat ghebeente des Conincx tot Edom tot asschen verbrant hebben.

16

Maer ick wil een

[p. *]

vier seynden in Moab, dat die palleysen tot Kirioth verteeren sal, also dat Moab steruen sal in een gheruyssche, Alarm, ghescrey, ende inder basuynen gheclanc.

17

Ende ic wil den Richter onder haer wtroeyen, ende alle hare princen, met hen verslaen, spreect die HERE