Den Bybel met groter neersticheyt ghecorrigeert (Liesveltbijbel 1542)

Menigerley openbaringen geschieden den prophete, inden welcken hem God die straffinge des lants ende des volcx te verstaen gheeft.

Dat .vij. Capittel

1

DIe HERE God toonde mi in een gesichte, Ende siet, daer stont een die sprinchanen maecte, effen doen dat koorn scier schieten soude. Nae dien dat dye Coninc sine schapen hadde laten scheeren,

2

Als si nv dat groene cruyt inden lande gansch af eten wouden, doen sprac ic. ⁺ Ach HERE God weest doch genadich, want wie wil Iacob weder op helpen? die soo seer cleyn geworden is?

+ A vers 2

3

Doen beroudet den HERE, ende sprac. Wel aen, ten sal niet gheschieden

4

Die HERE God toonde mi een gesichte, Ende siet die HERE God riep dat vier, om daer mede te straffen. Ende het verslinde een grote diepte, ende het adt ooc op dat erfdeele.

5

Doen seyde ic. Ach HERE God laet af, Wie wil doch Iacob weder op helpen? Want hi is ymmer seer cleyn,

6

Doen beroude dat den HERE ooc, Ende die HERE God sprack Ten sal niet gheschieden

7

⁺Hi vertoonde mi noch eens sulcke gesichte, ende die HERE stont op een geplaesterde muere, ende hadde een metsers meetcoorde in zijn hant. Ende dye HERE sprac tot mi, Amos was sietstu? Ic antwoorde Een metsers meetcoorde.

+ B vers 7

8

Doen sprac die HERE tot mi. Siet, ic wil een metsers meetcoorde midden door mijn volc Israels trecken, en hem niedt meer voorbi ghaen.

9

Maer dye hoochten Isaacs sullen verwoest, ende die kercken Israels verdoruen worden. Ende ic wil mi metten sweerde op maken ouer dat huys Ierobeams.

10

Doen sant Amasia die priester tot Bethel, aen Ierobeam den coninc Israels, ende dede hem segghen Amos maect dat huys Israels oproerich teghen v,

11

Ia dat lant en can sijn woorden niet ghelijden, Want Amos spreect also. Ierobeam sal metten sweerde steruen, ende Israel sal wt sinen lande geuangen wech gheuoert worden.

12

Ende Amasia sprac alsoo tot Amos, Du siender Gaet wech ende vliet int lant Iuda, ende geneert v al daer, ende propheteert aldaer,

13

⁺Ende en predict nyet meer tot Bethel, Want dat is des conincx, ende des coninclijcken hoofs beuel.

+ C vers 13

14

Amos antwoorde, ende sprac tot Amasia, ic en ben geen Propheet, noch geens Propheten soon, Maer ic ben een koeherder, die breembesien afpluckt,

15

Ende die HERE nam mi achter vander cudden, ende seyde tot mi. Gaet henen, ende propheteert mijnen volcke Israels,

16

Ende daeromme hoort nv des HEERN woort. Ghi segt, en propheteert teghen Israel niet Ende en spreect niet teghen dat huys Isahaks

17

daeromme spreect de HERE alsoo, Dijn wijf sal inder stadt geschent worden. ⁺ Dine sonen ende dochteren sullen metten sweerde verslagen worden. Ende dijn liggende goeden die sullen metter meetcoorde wtghedeelt worden, Mer ghi sult in een onreyn lant moeten steruen, Ende Israel sal wt sinen lande verdreuen worden.

+ iiij.reg. xiiij.