Den Bybel met groter neersticheyt ghecorrigeert (Liesveltbijbel 1542)

¶ Hi berispt den staet des gansschen volcx.

Dat .vi. Capittel

1

⁺WEe den stouten rijcken tot Sion, ende den ghenen die haer op dat geberchte Samarie verlaten, ⁺ die haer houden voor dye beste in alder werelt, ende bedrijuen haer heerscappie, so si willen inden huyse Israels.

+ A vers 1

+ Luc. vi.

2

Gaet henen tot Kalne, ende aenscout. Ende van daer tot Hemath der groter stadt, Ende trect henen af tot Gad der Philisteen, die welcke beter coninckrijcken geweest sijn dan dese, ende hare lantpalen ooc grooter dan die dine,

3

Nochtans sijn si veriaecht, doen haer quade vre quam.

4

Ende ghy heerschapt met ghewelt ende onrecht, Ende ghi ligt op yuoren oft olyfanten beenen beddekens, ende bedrijft uwe broodronckenschap op v tapijtse.

5

Dat beste wt der cudde eet ghy, ende die gemeste calueren, ende speelt op den psalter, ende ghi dichtet v liedekens als Dauid,

6

Den wijn drinckt

[p. *]

ghi wt schalen. Ende ghi salft ende smeert v metten besten olie oft balsem, Maer daer en is nyemant, die hem der schaden Iosephs aentrect

7

Daeromme sullen si voor aen gaen, onder den genen die gheuanghen wech gheuoert worden, ⁺ Ende dat brassen ende suypen der gulsigher sal ophouden, ⁺

+ B vers 7

+ Heb. vi. Ge. xxij Deu. vij.

8

want die HERE God heeft gesworen, bi sijnder sielen spreect die HERE God der heyrscaren, My verdriet die houaerdie Iacobs, ende hate ooc sijn paleysen. Ende ic wil die stadt ooc ouergeuen, met alle tghene dat daer in is,

9

ende ofter al thien mannen in eenen huyse ouerbleuen, so sullen si doch steruen moeten,

10

Also ooc dat een yeghelijc sijn naeste vrienden, vaders ende oomen nemen, ende die gebeenten wt den huyse draghen moet, Ende segghen totten ghenen die inder cameren des huys is. Isser ooc noch meer daer? Ende dye sal antwoorden, si sijn alle wech. Ende dander sal seggen Sijt te vreden, Want si en wouden niet datmen den name des HEREN soude ghedencken

11

Want die HERE heeft beuolen, datmen die grote huysen slaen soude, datse reten crijgen, Ende die cleyne huysen, datse gaten crigen.

12

Wie can met peerden rennen, oft met osschen ploegen op dye steenrootsen Also hebt ghi ^a dat recht in galle, ende die vruchten der gerechticheyt in alsen verkeert,

a Dat recht in galle. etc. dat is, ghi hebt den boosen los gelaten, ende den onnoselen verdruct ghi hebt dat goet quaet geoordeelt ende dat quaet goet gheseydt te wesen

13

ende ghi verblijt v, mer in gheenen eerbaren dinghen. Ende segt, en sijn wi niet machtich ende sterc genoech?

14

Daeromme siet, Ic wil ouer v, O ghi vanden huyse Israels, een volc verwecken, seyt die HERE God der heyrscharen, dwelck v benauwen sal, van die plaetse aen, daermen tot Hemath gaet, totter wilghen beke toe