Den Bybel met groter neersticheyt ghecorrigeert (Liesveltbijbel 1542)

¶ Na dien beual hem God weder tot Niniuen te gaen haer die straffinghe Gods te vercondighen, waer si haer niet en beterden

Dat .iij. Capittel.

1

⁺† ENde dat woordt des HEEREN gheschiede weder tot Ionam, ende sprac, maect v op, ende gaet inde groote stadt Niniue

+ A vers 1

2

Ende predict haer dat sermoon dat ick v segghe.

3

Doen maecte hem Ionas op, ende ginck henen tot Niniue na des HEREN beuel, Niniue was een stadt Gods, drie dachreysen groot

4

ende doen Ionas began in te gaen een dachreyse, Hi riep wt ende sprac. Niniue sal binnen veertich daghen vergaen.

5

Doen gheloofden dye lieden tot Niniue aen God, Ende si deden wtroepen een vasten, ende toghen sacken aen vanden grootsten totten minsten toe.

6

Ende doen dese sake voor den coninck tot Niniue quam, so stont hi vanden throone, ende leyde zijn purpur af, ende bedeckte hem met eenen sack, ende stelde hem in dye asschen,

7

Ende hy dede wtroepen, ende segghen tot Niniue, wt beuel des conincks ende zijnder raedtsheeren, so hier volcht. ⁺ Daer en sal noch mensch noch beest, noch osschen, noch schapen, yet proeuen, noch si en sullen oock nyedt weyden, noch water drincken,

+ mat. xij. Lu. xij

8

mer die lieden ende dieren sullen haer met sacken bedecken, ende crachtelijck tot God roepen. Ende een yeghelijck bekeere hem van zijn boose weghen, ende vander boosheydt dye een yeghelijck voor handen heeft

9

Wye weet? God mocht hem bekeeren, ende berou-crijghen, ende van zijn grammighe verbolghentheyt op houden, Also dat wi niet en vergaen.

10

Maer doen God aensach haer wercken, dat si haer bekeerden van hare boose weghen, doen beroude hem oock des ongheluckx, dwelcke hi voorghenomen hadde haer te doen, ende hi en dedes niet.