Den Bybel met groter neersticheyt ghecorrigeert (Liesveltbijbel 1542)

¶ Ionas wort toornich, Hi claecht ouer God die onderwijst ende straft hem.

Dat .iiij. Capittel.

1

⁺DAt verdroot Ionam seer, ende wert toornich, ende badt totten HERE ende sprack Ach HERE, ist dat nyedt dat ick seyde doen ick noch in mijnen lande was

+ A vers 1

2

Daeromme woude ick oock dat voorcomen met vlieden ter zee, want ick wist wel, dat ghi een genadich bermhertich, ende lancmoedich God zijt, ⁺ ende van groter goedertierenheydt, Ende dat ghy v laet rouwen des quaets,

+ ezec. iiij.

3

daeromme O HERE neemdt doch mijn leuen van my, want ick wilde lieuer doot zijn dan leuen.

4

Doen antwoorde dye HERE, Meent ghy dat ghy van rechts weghen gram zijt?

Ende Ionas ghinck ter stadt wt, ende stelde hem Oostwaerts teghen dye stadt, Ende hy maecte hem seluen aldaer een hutte oft tente, ende sadt onder haer scaduwe, tot dat hi sach, wat der stadt ghescieden soude.

5

Ende die HERE God hadde doen wassen eenen Kikaion oft Cowoorden struyck, die wies ouer Ionam, dat hi sinen hoofde een schaduwe maeckte, dye vermaecte ende vertrooste hem in zijn lijden, Ende Ionas verblijde hem seer van dien Cowoorden struycke,

6

maer des morghens schiep dye HEERE eenen worme, doen die dagheraet aen quam, dye stack den Cowoorden struycke, dat hy verdorrede,

7

Als nv dye sonne opgheghaen was, so schiep God eenen dorren Oosten wint. Ende die sonne stack Ionam op dat hooft also dat hy swack ende flau wert, doen wenschte hy zijnder sielen den doot, ende sprack Ic wil lieuer doot zijn, dan leuen.

8

Doen sprack God tot Ionam, Meendt ghy dat ghi met recht gram zijt om den Cowoorden struycke? ⁺ Ende hy sprac. Ia ic van rechts wegen ben ic ter doot toe toornich.

+ B vers 8

9

Doen seyde die HEERE, V iammert des Cowoorden struycx, daer ghy nyedt aen ghearbeyt en hebt, noch oock opghebracht, welcke binnen eender nacht gheworden, ende binnen eender nacht wederomme verdoruen is,

10

Ende my en soude dan niet iammeren Niniue der grooter stadt? Inder welcker meer zijn dan hondert ende twintich duysent menschen, dye geen onderscheet tusschen rechts ende slincx en weten? Daer toe ooc so veel beesten.