Den Bybel met groter neersticheyt ghecorrigeert (Liesveltbijbel 1542)

¶ Dye Propheet Nahum.

[p. *]

¶ Hi looft ende prijst die macht ende cracht Gods. Ende hi bewijst ooc sijn goedertierenheyt, Hi straft die Niniuiten om dat si Gods raet ende straffinghe verachten.

Dat .I. Capittel.

[afbeelding]

1

⁺DIt is den last ouer Niniue, ende die Prophetie Nahum van Elkos,

+ A vers 1

2

die HERE is een zeloersche God, ende een wreker, Iae een wreker is die HEERE ende een thoornich man. ⁺ Die HEERE is een wreker teghen sine vianden, ende die sine teghenpartijders niedt vergheten en sal,

+ Deut. v. Rom. ij.

3

die HERE is lancmoedich, ende van grooter cracht, ende hi en laet gheen dinc onghestraft, hi is die HERE, wiens weghen int onweder ende in die tempeeste sijn, ende onder sijn voeten dicke wolcken.

4

Die die zee straft ende gebiet, ende maectse drooge, ende hi doet dat alle riuieren versipen. Basan ende Carmel ende soo wat daer op den berch Libanon bloeyt, dat moet voor hem verscricken.

5

Die berghen beuen voor hem, die hueuelen vergaen ende versmelten. Die aerde vliet ende beeft voor hem, daer toe die gansche omloop des werelts, ende alle die daer in woonen.

6

Wie can voor sinen thoorne staen, ende wie can voor sine gramscap geblijuen? Sinen thoorne bernt ghelijck een vier, ende die steenrootsen springhen ontstucken voor hem

7

Die HERE is goedertieren, ende een vasticheyt inder tijt der noot. Ende hi kent die ghene, die op hem betrouwen,

8

Wanneer dat die wateruloet heyr ouerloopt, so maect hi met dier plaetsen een eynde. Ende sine vianden veruolcht hi met duysternisse.

9

⁺Wat ist dan? dat ghi tegen den HERE yet voorneemt: Hi en latet v doch niet volbrenghen, Maer die tribulatie en sal niet eewelic dueren,

+ B vers 9

10

Want ghelijck als die doornen in malcanderen gheulochten wassen, ende in dat beste sap sijn, ende ghelijck dat dorre stroo verbernt wert,

11

Also sal ooc des schalcx raet, die wt v coemt, om quaet teghen den HEERE te dencken, vergaen.

12

Also spreect die HERE God. Laetse comen so ghewapent ende machtich als si willen, So sullen si nochtans ter neder gehouwen worden, ende wech varen? Dan wil ic v verootmoedigen, mer nochtans niedt gansch verderuen,

13

Maer als dan wil ick sijn iock v afrucken, ende dijn banden verschoren,

14

Maer tegen v heeft die HERE een beuel gegeuen, dat van dijnen name gheen saet meer blijuen en sal Inden huyse dijne Gods wil ic v wtroeyen, Ick wil eenen gracht onder die Godekens ende beelden gheuen, Ende ghi moet tot schande comen

15

Siet op die bergen comen voeten eens goeden bode, die goede mare ende tijdinghe brengt, O Iuda hout dijnen vierdach, ende betaelt dijne gheloften, Want die schalc en sal niet meer ouer v comen, Hi is gansch wtgheroeyt