Den Bybel met groter neersticheyt ghecorrigeert (Liesveltbijbel 1542)

¶ In dit visioen wort die almachtighe cracht Gods bewesen Die vrede gheeft welcken volcken hi wil, Ende wederomme oorlooch den welcken hi wil.

Dat .vi. Capittel.

1

⁺ENde ick hief mijn ooghen weder op, ende sach, Ende siet, Daer voeren vier waghens wt tusschen twee berghen, Ende dye berghen waren coperen,

+ A vers 1

2

Inden eersten waghen stonden roode peerden, Inden anderen waghen waren swerte peerden,

3

Inden derden wagen waren witte peerden, Inden vierden waren van verscheyden verwe, ende stercke peerden.

4

Ende ick antwoorde, ende seyde totten Enghel, dye met mi sprac. Mijn HEre wat bedieden dese?

5

Die Engel antwoorde, ende sprac tot mi. Dese zijn die vier winden

[p. *]

des hemels die wt varen, op dat si voor den Heerscher der gansscher werelt staen souden.

6

Daer die swarte peerden in waren, die voeren int lant tegen Tnoorden, Ende die witte voeren ooc wt na haer, Die van versceyden verwe waren, ghingen tegen dat Zuyden,

7

Ende die stercke voeren ooc wt, ende begonden dat gansche aertrijck te doortrecken, Ende hi sprac, Gaet henen ende doortrect dat aertrijcke.

8

Ende si togen door tlant, doen riep hi mi, ende sprac met mi seggende. Siet die int Noortsce lant varen, die sullen mijnen gheest inden Noortschen landen doen rusten.

9

Ende des HEREN woort gheschiede tot my, ende sprac,

10

⁺Neemt van die geuangene, die van Babel gecomen sijn, te weten Heldai, Tobia, ende Iedaia, ende comt inden seluen dage, ende gaet int huys Iosie, des soons Zephania,

+ B vers 10

11

Neemt aldaer siluer ende goudt, ende maect twee cronen daer van, ende setse op dat hooft Iosua des soons Iozadak, des hoogen priesters, ende segt tot hem.

12

Die HERE der heyrscharen seyt also, Siet dye man, wiens name Zemach is, die na hem voorwaerts wassen sal, die sal des HEREN tempel tymmeren.

13

Iae den tempel des HEREN sal hi tymmeren, Ende hi sal dat cieraet dragen, Ende sal sitten, ende heerschen op sinen Throone, Ende die priester sal ooc op sinen Throone sitten, Ende daer sal tusschen haer beyden vrede sijn,

14

Ende die croonen sullen inden tempel des HEREN den Heldai, Tobia, Iedaia, ende Hen, den sone Zephania tot eender gedachtenisse sijn. Ende daer sullender van verre comen, die aen des HEREN tempel timmeren sullen

15

Dan sult ghi beuinden, dat mi die HERE der heyrscharen tot v ghesonden heeft, Ende dat sal gheschieden als ghi der stemmen dijns HEREN dijns Gods ghehoor gheuen wilt.