Den Bybel met groter neersticheyt ghecorrigeert (Liesveltbijbel 1542)

¶ God onderwijst sinen volck wat dat recht vasten si, oordeel ende gherechticheyt te onderhouden, den naesten goet doen, weduwen ende weesen beschermen, nyemant onrecht noch gewelt doen.

Dat .viij. Capittel

1

⁺ENde het gheschiede inden vierden iare des Conincx Darij, dat des HEREN woort ghesciede tot ZacharIa opten vierden dach der negender maent, Welcke men Chilef heet.

+ A vers 1

2

Doen SarEEzer ende RegenMelech met haren ghesellen tot BethEl seynden om voor den HERE te bidden,

3

ende deden den priesteren seggen die in dat huys des HEREN der heyrscharen waren, ende oock tot den Propheten,

4

Moeten wy oock noch weenen in die vijfste maent, ende ons castijen gelijc wi nv deser Iaren sommige gedaen hebben? Doen gesciede dat woort des HEREN der heyrscharen tot my, Ende sprac.

5

Segt alle den volcke inden lande, ende den Priesteren, ende spreect. Doen ghi vaste, ende rouwe droecht, ende claechde in dye vijfste ende seuenste maent, dese .lxx. iaer lanck, hebt ghi mi oock alsoo moeten vasten?

6

Oft doen ghi aet ende dronckt, en hebt ghi niet voor v selfs gegeten ende gedroncken?

7

En ist niet dat selue? dat welck die HERE liet prediken door die voorleden propheten? Doen Hierusalem bewoont wert, ende ghenoech hadde? met hare steden ende luyden rontom, beyde die woonden tegen Tsuyden ende in die leechten?

8

¶ Ende des HEREN woort geschiede tot ZacharIa, Ende sprack.

9

Also seyt die HERE der heyrscharen. Oordeelt met trouwe ende waerheyt, Ende een yegelijc bewijse aen sinen naesten vriendelicheit ende bermherticheit,

10

⁺Ende en doet geen ongelijc den weduwen, weesen, vreemdelingen ende armen, ende nyemant en dencke in sijnder herten yet quaets, teghen sinen naesten,

+ B vers 10

11

Mer si en wouden daer nyet op mercken, ende si keerden mi den rugge toe, ende stopten hare ooren, op dat si mi niet hooren en souden,

12

Ia si maecten haer herten so hart als een Diamant, dat si niet hooren en souden die wet ende die woorden, welck dye HEEE der heyrscharen in sinen gheest, door die voorgaende Propheten ontboden hadde. Daerom is die HERE der heyrscharen op haer so viantlijc vertoornt geweest.

13

Ende het is also vergaen, ghelijc als die prekinge was, ende want si niet hooren en wouden, So en woude ic ooc niet hooren, doen si riepen spreeckt dye HERE der heyrscharen.

14

Alsoo heb ickse verworpen onder alle Heydenen, die haer onbekent waren. Ende dat lant is daer na alsoo woest ghebleuen, datter nyemant in en wandelde noch en woonde, Ende dat Edele lant is tot een verwoestinghe ghemaect.