Den Bybel met groter neersticheyt ghecorrigeert (Liesveltbijbel 1542)

¶ Hi vermaent ende begrijpt als in eender summa, die oorsake waeromme God vertoornt si, voormaels ende oock nv, In dyen men weder keere soo wilt hi weder ghenadich sijn.

Dat .viij. Capittel.

1

⁺ENde dat woort des HEREN ghesciede tot mi ende sprack.

+ A vers 1

2

Alsoo seyt die HERE der heyrscaren, Ic heb een seer grote zeloersche liefde tegen Zion, Ende ick ben seer fellijcken op haer verthoornt.

3

Die HERE seyt alsoo, Ick wil my weder tot Zion keeren, ende ic wil tot Hierusalem woonen, Want men sal Hierusalem een getrouwe warachtige stadt heeten, ende den berch des HEREN der heyrscharen eenen heylighen berch.

4

Also seyt die HERE der heyrscharen, daer sullen noch oude mannen ende wijuen tot Hierusalem op die straten sitten,

5

die van groten ouderdom met stocken gaen sullen, Ia die straten vander stadt sullen noch vol ionge knechtkens ende meyskens sijn die op die straten spelen, ende tocken, iocken, ende boerden sullen.

6

Also seyt die HERE der heyrscharen. Dit schijnt onmogelic te sijn, voor den oogen deses ouergebleuen volcx, op dese tijt, Soudt daerom ooc onmoghelijck sijn voor mijnen ooghen spreect die HERE der heyscharen.

7

Die HERE der heyrscharen spreect also, ⁺ Ic wil mijn volc vanden opganck ende nederganck der sonnen verlossen,

+ B vers 7

8

ende wilse weder brenghen, dat si tot Hierusalem woonen, Ende si sullen mijn volc sijn, ende ic wil haer God sijn, in trouwe ende waerheyt, ende gherechticheit

9

Also spreect die HERE der heyrscharen, Sterct uwe handen, ghy die dese woorden hoort, nv ter tijt door der Propheten monde, in dien dage doen dat fondament gheleyt is aen dat huys des HEREN der heyrscharen, dat den Tempel ghetimmert wert,

10

Want voor desen dach was des menschen arbeyt te vergeefs, ende der beesten arbeyt was ooc niet. Ende daer en was geenen vrede, van ancxt der vyanden, den ghenen die daer wt ende in toghen. Mer ic liet allen menschen gaen eenen yegelijcken teghen sinen naesten,

11

Mer nv en wil ick desen ouerghebleuen volcke niet doen, ghelijck voormaels spreect die HERE der heyrscharen,

12

Maer si sullen een zaedt des vreedts sijn. Den wijnstock sal sine vruchten gheuen, Ende dat aertijcke sijn gewasch Ende den hemel sal sinen ^a dauwe gheuen. Ende ick wil die ouerghebleuen deses volcx, sulcx al laten besitten ende beeruen.

a Door desen dauwe wert verstaen die gratie des heylighen gheests, die door Christum in deser werelt dalende den geloouigen gegeuen is, voortbrengende dye broederlike liefde.

13

Ende het sal gheschieden, ghelijck ghi vanden huyse Iuda, ende ghi vanden huyse Israels eenen vloeck gheweest sijt, bi alle heydenen Also wil ic v ooc helpen, dat ghi een seegeninghe sijn

[p. *]

sult. Daeromme en veruaert v niet ende sterct uwe handen.

14

⁺Want alsoo spreect die HERE der heyrscharen, ⁺ Gelijc als ick ghedachte v te plaghen, doen my uwe vooruaders verthoornden spreeckt die HERE der heyrscharen, ende ic mi ooc des nyet en liet berouwen.

+ B vers 14

+ Ag. ij.

15

Also ghedencke ic nv wederomme in deser tijt goet te doen Ierusalem, ende den huyse Iuda, ende daeromme en weest niet versaecht.

16

Ende dit sijn die dinghen dye ghi doen sult, een yegelic spreke met sinen naesten die waerheyt, ende ordelt recht, ende spreect dat rechte wt, trouwelijc, waerlic ende vredelijck in uwe poorten,

17

ende niemant en dencke arch in sijnder herten tegen sinen naesten. Ende ghi en sult niet beminnen valsche eeden te sweeren, Want dat sijn die dinghen dye ick hate, spreect die HEEE.

18

Ende dat woort des HEREN der heyrscharen geschiede tot mi, ende sprack,

19

Alsoo spreect dye HERE der heyrscharen, Die vasten der vierder, vijfster, seuender ende thiender maenden, die sullen den huyse Iuda tot vruechde, ⁺ ghenoechte, ende tot blijde iaerfeesten worden. Alleen hebt lief trouwe, waerheydt, ende vrede.

+ Gal. iiij Ioan. iiij

20

Alsoo spreect die HERE der heyrscharen. Daer sullen noch veel volcken ende inwooners van veel steden wedercomen.

21

Ende die borghers der eender stadt sullen reysen totter anderder, ende segghen, wel op, Laet ons gaen voor den HEERE om te bidden, Ende te soecken den HERE der heyrscharen,

22

Wi willen ooc met v gaen. Alsoo sullen vele machtighe volcken ende heydenen met hoopen comen, om te soecken den HERE der heyrscharen tot Hierusalem, ende hem aenbidden.

23

Also spreect die HERE der heyrscharen, ter seluer tijt sullen thien mannen wt alle spraken der heydenen, eenen Iode met die slippen grijpen, ende seggen Wi willen met v gaen, want wy hebben ghehoort dat God met v is.