Den Bybel met groter neersticheyt ghecorrigeert (Liesveltbijbel 1542)

¶ Die oude Tobias looft God den HERE, ende verwect oock die andere, hem te louen ende te eeren

Dat .xiij. Capittel

1

⁺ENde die oude Tobias dede sinen mont open, ⁺ ende gebenedide den HERE, ende seyde HERE ghi zijt groot inder eewicheyt, ende v rijc is vander eender tijt totter ander tijt,

+ A vers 1

+ i.re. ij.a. Sapien. xvi.b.

2

want ghi geesselt ende behout, ghi leyt ^a ter hellen, ende leyt daer weder wt, ende daer en is niemant die v handt ontulie.

a Ter hellen leyden, ende weder wt) dat is, die heere vernedert ende benaut somtijden den mensche, ende corts verheft ende vertroost God den mensche weder

3

Belijdt den HERE, ghi kinderen Israels, ende looft hem in die tegenwoordicheyt der heydenen,

4

daerom heeft hi v verstroyt onder die heydenen, die hem niet en kennen, dat ghi sine wonderlijcke daden soudt vercondighen, ende hen doen weten, datter gheen ander almachtich God en is, dan hi.

5

Hi heeft ons gecastijt om onse ongerechticheden, ende hi sal ons behouden om sine ontfermherticheyt

6

Daerom aensiet die dingen die hi met v gedaen heeft, ende belijdt hem met vreesen ende beuen, ende verhoocht den coninc der werelden, in uwen wercken

7

Maer ic wil hem belijden inden lande mijnder geuanckenissen, want hi heeft zijn maiesteyt getoont in dat sondige volc

8

Hierom, O ghi sondaers wert bekeert, ⁺ ende doet rechtuaerdicheyt voor Gode, geloouende dat hi zijn ontfermherticheyt met v doet

+ B vers 8

9

Mer ic, ende mijn siele sullen ons in Gode verblijden

10

Gebenedijt den HEERE alle sine wtuercorene Houdt dagen der blijscappen, ende belijdt hem.

11

Ierusalem ghi stadt Gods, die HERE heeft v gecastijt, inden wercken uwer handen. Belijdt den HERE in uwen goeden,

12

ende gebenedijt God der werelden, op dat hi zijn tabernakel weder in v timmere, ende dat hi alle die gheuanghenen weder tot v roepe,

13

ende dat ghi v moet verblijden inder eewicheit. Ghi sult met een schijnende licht blincken, ende alle eynden der aerden sullen v eeren.

14

Daer sullen volcken van verre tot v comen, ende si sullen gauen brenghen,

15

ende

[p. *]

sullen den HERE in v aenbeden, ende si sullen v lant voor heylichmakinge houden, want si sullen den groten naem in v aenroepen.

16

⁺Ende si sullen veruloect zijn die v versmaden, ende si sullen al verdoemt zijn die v lasteren, Ende si sullen gebenedijt sijn, die v tymmeren

+ C vers 16

17

Maer ghi sult v verbliden in v kinderen, want si sullen alle gebenedijt werden, ende totten HERE vergadert

18

Salich zijn si alle die v lief hebben, ende die hen verblijden ouer uwen God.

19

Mijn siele gebenedijt den HERE, want die HERE onse God heeft Ierusalem zijn stadt van allen haren tribulatien verlost, Ic sal salich zijn, ist dat mijn saet ouerblijft, om te sien die claerheyt Ierusalem.

20

Die poorten Ierusalem sullen van Saphyren, ende Smaragden werden getimmert, ende alle den omganc haerder mueren, van costeliken gesteente.

21

Alle haer straten sullen met witten marmer steenen werden geplaueyt, ende door haer steechskens sal Haleluya gesongen werden,

22

Ghebenedijt si die HERE, diese verhoocht heeft, dat zijn rijck si inder eewicheyt ouer haer.