Den Bybel met groter neersticheyt ghecorrigeert (Liesveltbijbel 1542)

Hier begint dat boeck Iudith

¶ Van die heerlicheyt der stadt Egbathanis, ende vanden opganck des Conincx Nebucad Nezers van Assyrien.

Dat .eerste. Capittel

[afbeelding]

1

⁺ARphaxat dye Coninc der Meden, had veel volcx zijnder heerlicheyt onderdanich ghemaeckt, ende hi tymmerde een aldermachtichste stadt dye hi Egbathanis hiet,

+ A vers 1

2

hi maecte haer mueren van viercanten, ende van gehouwen steenen Inder hoochsten .lxx. ellen, ende inder breyden .xxx. ellen.

3

Ende haer toornen sette hi in die hoocheyt .C. ellen,

4

maer hare beyde viercante siden hielden inder wijden .xx. voeten Ende hy sette haer poorten in die hoocheyt des torens, ende hi glorieerde als een machtighe, inde machticheyt zijns heyrs, ende in die heerlicheydt sijnder waghenen.

5

⁺Aldus int .xij. iaer sijns rijcx Nabuchodonosors der Assyrien coninc, die in die grote stadt Niniue regneerde, street tegen Arpharat,

+ B vers 5

6

ende creech hem in dat groote velt,

7

dwelcke heet Ragau, bi Euphraten, ende Tygrum ende Iadason, in dat velt Erioth, des conincx Elicorum.

8

Doen is dat rijck Nabuchodonosors verhoocht, ende sijn hert is verheuen,

9

⁺ende hi seynde tot allen den genen die daer woonden in Cilicia ende Damasco, ende Libano, ende ooc totten heydenen die daer zijn in Carmelo ende Cedar, ende die daer bewonende zijn Galileam, in dat groot veldt Esdrelon, ende alle die daer waren in Samaria, ende door die vloet die Iordane tot Ierusalen toe,

+ C vers 9

10

ende tot alle den lande Iesse, tot datmen totten berghen der mooren coemt.

Tot allen desen seynde Nabuchonosor der Assyrien coninc boden,

11

die hem alle wederseyden met eenen gemoede, ende si seyndense wederom ydel, ende verworpense sonder eere.

12

Doe wert die coninc Nabuchodonosor verbolgen tegen alle dlant, ende hi swoer bi sinen throon, ende by sijn rijck, dat hi hem soude wreken aen allen desen lantscappen.