Den Bybel met groter neersticheyt ghecorrigeert (Liesveltbijbel 1542)

Van die onuersadighe begeerten Nebucad Nezers om te regneren, ende die landen in te nemen

Dat .ij. Capittel

[p. *]

1

⁺INden derthiensten iaer des conincx Nabuchodonosors den .xxij. dach der eerster maent, so isser een woort gheschiet inden houe Nabuchodonosors des Conincx der Assyrien, dat hi hem soude bescermen.

+ A vers 1

2

Ende hi riep alle die ouders, ende alle zijn hooftlieden, ende alle zijn strijtbaer crijschknechten,

3

ende hy gaf hen te kennen sinen heymeliken raet. Ende hi seyde dat sijn ghedachte daer inne was, dat hy alle dlant onder zijn heerschappie soude brenghen.

4

Doen hi dit geseyt had, ende het hen al behaechde, ⁺ soo riep Nabuchodonosor die coninc Holofernem den prince zijns heyrs, ende seyde hem.

+ B vers 4

5

Gaet wt tegen alle trijck van westen, ende sonderlinge teghen die gene die mijn gebot versmaet hebben.

6

V oge en sal geen rijc sparen, ende ghi sult mi alle vaste steden onderdanich maken

7

Doen riep Holofernes die hertogen, ende meesterscappen der cracht der Assyrien, ende heeft die knechten op den tocht gemonstert,

8

gelijc hem die coninc beuolen had, hondert ende .xx.M. strijtbaer voetknechten, ende .xij.M. scutters te peerde.

9

Ende hi dede alle zijn heyruaert voorgaen in menichte der ontelliker kemelen, met die dingen die den heyrscaren oueruloedelic genoech waren,

10

ooc cudden der ossen, ende cudden der scapen, dier geen getal en was. Ende hi bescicte tarwe van allen Syrien te bereyden in sinen doorganc. Ende hy nam met hem wter maten veel gouts ende siluers, van des conincx huys.

11

⁺Ende hi is gereyst, ende alle theyr met waghenen ende reysenaers, ende schutters, die daenschijn der aerden bedecten als sprinchanen.

+ C vers 11

12

Ende doen hi die eynden der Assyriers door was gegaen, so quam hi totten grooten bergen Ange, die daer leyt ter slincker siden Celicie,

13

ende hi steech op al haer casteelen, ende creech alle vestingen, Ende hi brac die alderbeste stadt Melothi, ende hi beroofde alle die kinderen Tharsis, ende die Ismaeliten, die daer waren teghen dat aenschijn der woestinen, ende suydwaert des lants Cheleon,

14

ende doorginc Euphratem, ende quam in Mesopotanien, ende brac alle hooge steden, die daer waren vander beken Mambre, tot datmen coemt totter zee,

15

ende hi besloech haer frontieren van Celicia totten einde Iaphet die suydwaerts leyt.

16

Ende hi leyde wech alle die kinderen Madian, ende hi beroofde alle haer rijckdom, ende alle die hem wederstonden, versloech hy metter scherpten des sweerts.

17

Ende na dese dingen tooch hi af op die velden. Damasci, inder tijt des oogsts, ende hi aenstac al dat staende coren, Ende hi dede afsnijden alle boomen ende wijngaerden, ende sijn vreese viel ouer alle die opter aerden woonende waren.