Den Bybel met groter neersticheyt ghecorrigeert (Liesveltbijbel 1542)

¶ Vele coninghen, princen, ende landen wt vreese van hem gheuen haer op, ende worden hem onderdanich.

Dat .iij. Capittel.

1

⁺DOen seynden die coninghen ende princen alre steden, ende lantscapen haer legaten, ooc Syrie ende Mesopotanie, ende Syrie Sobal, ende Libie, ende Cilicie, die welcke tot Holofernem quamen, ende seiden

+ A vers 1

2

Laet v verbolgentheyt ophouden teghen ons, want tis beter dat wi den groten coninc Nabuchodonosor leuende dienen, ende dat wi onderdanich zijn, dan dat wy steruen met onser verderuinghe, ende wi selue die schade ons diensts lijden.

3

Alle onse steden, ende al ons besittingen alle bergen, ende houelen, ende velden, ende die cudde der ossen, ende der scapen, ende geyten ende der peerden ende kemelen, al ons goet ende gesinnen zijn in uwen aensichte. Laetse al onder v gewelt zijn,

4

wy ooc ende ons kinderen zijn v knechten. Coemt ons een vredemakende here, ende besiget ons diensts, alsoot v behaecht

5

Doen tooch Holofernes af vanden bergen, metten reysenaers, ⁺ met groter cracht, ende nam alle vaste steden in, ende alle inwoonders des lants. Ende hi nam hem van allen steden hulpende stercke mannen, ende wtghecoren totten orloge.

+ B vers 5

6

Ende dien lantscapen viel so grooten vreese dat die inwoonders alle der steden, princen ende regeerders tsamen metten volc wtgingen, den comenden te gemoet, ontfangende hem met cranssen ende toortsen, dansende in tamboeren ende hoornen.

7

Nochtans dit doende, en mochten si die wreetheit zijns herten niet versaechten Want hi bederf haer steden, ende hieu haer bosschen af.

8

Want die coninc Nabuchodonosor had hem geboden, dat hi al die goden des lants wt soude worpen, te weten op dat hi alleen God soude worden gheheeten, van dien natien, die midts Holofernes gewelt onder hem ghebracht werden.

9

⁺Ende doen hi door tooch door Syriam Sobal, ende alle Appamiam, ende alle Mesopotamiam, quam hi totten Edomeen, int lant Gabaa ende Septopoli, ende nam haer steden in, ende bleef daer .xxx. dagen, in welcken daghen hi geboot alle dat heyr zijnder cracht vergadert te worden

+ C vers 9