Den Bybel met groter neersticheyt ghecorrigeert (Liesveltbijbel 1542)

Hier begint dat boec der wijsheit

Een vermaninghe der ouersten totter wijsheyt dye gheest des wijsheyts, haer valscheyt ende hypocrisie, straft die ongerechticheyt ende die quade clappaerts.

Dat .I. Capittel

1

⁺NEemt de wijsheyt ter herten, ghi die dat lant regeert ⁺ Geuoelt vanden HERE int goede, ende soect hem in eenuoudicheyt des herten.

+ A vers 1

+ Exodi. xviij.e. Deut. i. xvij.f. ij.para. xv.g Ios. i.d. iij.re. iij.a

2

Wandt hy wert geuonden vanden ghenen dye hem niet en tempteren, ende hi verschijnt den ghenen die hem betrouwen

3

Want verkeerde ghedachten verscheyden van Gode, mer beproefde duecht berispt die onwijse.

4

Want die wijsheyt en sal niet nyet ingaen in een quaetwillige siele, ⁺ noch si en sal niet woonen in een lichaem dat der sonden onderworpen is.

+ Ie. iiij.b Lu. xi.d Matth. vi. vij. lu. xij.b

5

Die heylige geest die daer onderwijst, sal den geveysden vlien, ende hi sal hem seluen wech nemen vanden gedachten die sonder verstant sijn, ende sal berispt werden vander ouercomender ongerechticheit.

6

Want de geest der wijsheyt is vriendelijc, ⁺ saecht, goedertieren, ende hy en sal gheen behagen hebben, aen dyen, dye met sinen lippen boosheyt spreect, ⁺ want God is een kender sijnder nieren, ⁺

+ esa. xxix d

+ mat. xv.c

+ Ie. xxiij

7

ende een ondersoecker sijnre herten, ende een hoorder sijnder tongen, ⁺ want den gheest des HEEREN heeft den omganc der aerden veruult, ende dat alle dingen onthout, ⁺ heeft ooc die kennisse der stemmen.

+ Actuum vij

+ deu. .iiij.a.

8

⁺Hier om die ongerechte dingen spreect, en mach niet verborgen blijuen, ⁺ noch dat berispende oordeel en sal hem niet voorby gaen. ⁺

+ B vers 8

+ esaie xxix

+ esa. xix.c

9

Want in des godlosen gedachten sal die vraginge sijn, ende die ouerleueringe sijnder redenen sal tot God comen, ende die sal ooc sine ongherechticheydt straffen. ⁺

+ Prouer. xxiiij.d Psal. c. Matth. v. vi. vij

10

Wandt dat oor des zeloesers hoort alle dinghen, ende dat gerucht der murmuratien, en sal niet verborghen werden.

11

Hierom wacht v van murmureringhe, die niet en vordert, ende spaert uwe tonghen van achterclap Want een ydel reden, en sal niet te vergeefs gaen, ende eenen mont die ^a liecht doot die siele.

a Logene in die scriftuer en is niet alleen te segghen tgene dat men nyet wisselic en weet mer principalijc sijnt die woorden oft redenen, door welcke die menscen afgekeert worden vander waerheyt, ende alsoo gheen seker betrouw en hebben ghelijck ozee. xij.a staet, ende inden iiij. ende .v psalm.

12

En wilt die doot niet beeersten, in die dolinghe ws leuens, noch en verderft v seluen niet, inden wercken uwer handen.

13

⁺Want God en heeft dye doot niet gemaect, noch hi en verblijt hem niet in dat vergaen der leuendiger.

+ C vers 13

14

Want hi sciep alle dinghen om dat si wesen souden, ende hi heeft alle volcken der aerden gemaect om dat hen wel soude sijn, ende dat in hen gheen verderffenis en ware, noch dat der hellen rijck inder aerden niet en ware,

15

want die gherechticheyt is eewich ende on-sterffelijc, maer die ongerechticheyt is dye vercrijginge der doot.

16

Maer die godloose hebbense doen comen met wercken ende woorden, ende dye achtende een vriendinne, sijn si afgeuloeyt, ende si setten een verbont met haer, want si sijn der doot waerdich, die wt haren deele sijn.