Den Bybel met groter neersticheyt ghecorrigeert (Liesveltbijbel 1542)

Met wat stantachticheyt ende sekerheyt die gherechte staen sullen, teghen die ghene die haer bespot ende gequelt hebben, ende hoedanighen grouwel dat den godloosen ouercomen sal, ende wat si alst te spade is segghen sullen. Ende daer teghen vander vruechde der gheloouigher, welcker God dye HEERE een beschermer wesen sal.

Dat .v. Capittel.

1

⁺DAn sullen dye gherechtighe in grooter volstandicheyt staen, tegen die gene diese benaut hebben, ende die haer arbeiden wech genomen hebben,

+ B vers 1

2

Siende sullen si met eyschelijker vreesen werden verscrict ende si sullen verwonderen in die haesticheyt der ongehoopter salicheit,

3

suchtende van benautheyt des geests seggende bi hen seluen, leetwesen bewisende, ende van bangicheyt des gheests suchtende.

4

Dit sijnse die wi somwijlen in spotte gehadt hebben, ende in gelijckenisse der lachteringe,

5

wi ontsinnige menscen achteden haer leuen raserie te wesen, ende haer eynde sonder eere Siet hoe sijn si onder dye kinderen Gods gerekent, ende haer deel is onder die heylighen.

6

Daeromme hebben wi gedwaelt vanden wech

[p. *]

der waerheit, ende dat licht der rechtuerdicheit en heuet ons niet ghescenen, ende die sonne der verstandenisse en is ons niet opgegaen,

7

wi sijn moede geworden inden wech der ongerechticheit ende der verdoemenissen, ende wi hebben sware wegen gewandelt, mer den wech des HEREN en hebben wi niet gheweten.

8

Wat heeft ons onse houaerdicheit gebaet, oft wat heeft ons dye beroeminge der rijcdommen gegeuen

9

⁺Alle die dinghen sijn doorgegaen als een scaduwe, ende als een voorloopende bode,

+ B vers 9

10

ende als een scip het welcke door dat vloyende water gaet, des welcx spore niet te vinden en is, alst voorbi is gegaen, noch den wech des bodems des schips inden stromen.

11

Oft eenen vogel die dooruliecht, in die lucht, des welcx men geen teeken des weechs en vint,

12

maer alleen dat geluyt der vlogelen, slaende den lichten wint, ende door cracht des weechs snidende die locht, die vlogelen beweecht hebbende is hi dore geulogen, ende daer na en wert geen teeken sijns weechs geuonden.

13

⁺Oft als eenen pijle die wt gheschoten is in eenen doel, die locht deylt, ende die locht weder te samen valt datmen niet en siet waer hi door geuaren is,

+ C vers 13

14

also sijn wi ooc. Also haest als wi geboren sijn ende wi niet meer en sijn, also en hebben wi ooc gheen teeken der duecht getoont Mer wi sijn in onse quaetheit vergaen.

15

Aldusdanige dingen sullen si spreken die inder hellen sijn, die gene die gesondicht hebben, want den hope der godlosen is als een dorre dijstel bloeme, die vanden winde wech wert geuoert, ende als een dunne scuyme die vanden waterbaren wert verspreyt, ende als eenen roock, die vanden winde gesceyden is,

16

ende als die gedachtenisse eens voorby gaenden gasts, van eenen dage.

17

Maer die rechtuerdige sullen inder eewicheyt leuen ⁺ ende haren loon is biden HERE, ende haer ghedachte is byden alder oppersten,

+ psalm. xxxix. lxxvij. iob. viij.d

18

hieromme sullen si dat rijcke der scoonheit, ende die croone des hoops vander hant des HEREN ontfaen, want hi salse decken met sijnder rechter hant, ende hi salse met sinen arme beschermen.

19

Ende sine ernste sal die wapinge nemen, ende hi sal de creatueren wapenen tot wrake der vyanden.

20

Hi sal voor den yseren halsberch, die gerechticheit aen doen, ende hi sal voor den helm een seker oordeel nemen ⁺

+ ephe. vi

21

Hi sal den onuerwinlijcken schilt die gerechticheyt nemen,

22

ende hi sal die wreede gramschap scerpen, tot een speere, ende den rinc der aerden sal met hem, teghen dye ontsinninge vechten. Die donder pijlen sullen wt den blixem gaen, ende wt den reghenboge der wolcken in die bestelde plaetsen varen ende slaen.

23

Ende vander steenachtiger gramscap sullen volle hagelen werden geseynt ende dat water der zee sal daer tegen haer opclimmen ende die stromen sullen hardelic tsamen loopen.

24

Dye gheest der cracht sal tegen die staen, ende salse deelen als een verstooringhe des wints, ende hi sal alle tlant haerder ongerechticheit totter wildernisse brengen ende die quaetheyt sal der machtiger wooningen omme keeren.