Den Bybel met groter neersticheyt ghecorrigeert (Liesveltbijbel 1542)

Een vermaninghe aen die regenten ende ouersten dat si doch op die wijsheyt acht hebben. Ooc van tlof ende profite der wijsheydt.

Dat .vi. Capittel

1

⁺WIisheyt is beter dan crachten, ⁺ ende een voorsichtich man dan een stercke.

+ A vers 1

+ Ecclesi. ix.d.

2

Hieromme o ghi coningen hoort ende verstaet, ghi rechters der eynden der aerden leert.

3

Langt die ooren ghi die dye menichten onthout, ende behaecht v seluen, in die scaren der volcken.

4

Want v is machte vanden HERE gegeuen, ende crachte vanden alderhoochsten, die v wercken sal beproeuen, ende hi sal die ghedachten ondersoecken,

5

want als ghi dienaers sijns rijcx waert, so en oordelde ghi niet recht, noch ghi en bewaerdet die wet der rechtuerdicheit niet, noch ghi en wandeldet niet na sinen wille.

6

Hi sal v vereyselijc ende haestelijck verschijnen, want daer sal een alder hertste ordeel geschieden, in die ghene die voor ander staen,

7

⁺Want den cleynen wert ontfermherticheyt verleent, mer die machtige sullen machtelijcke pijnen lijden.

+ B vers 7

8

Want God die verheerder alre dingen is, en sal nyemants persoon wtnemen, noch hi en sal nyemants grootheyt ontsien, want hi heeft den cleynen ende den grooten selue gemaect, ende hi draecht van allen sorghe ghelijc.

9

Maer den sterckeren, staet stercker straffinghe aen.

10

Hierom o ghi coningen, tot v sijn dese mijn redenen, op dat ghi wijsheyt leert, ende dat ghi niet en mist,

11

want dye die gerechticheit bewaren, die sullen rechtuerdelic geordeelt werden, ende die rechtuerdige dinghen geleert hebben, die sullen vinden wat si antwoorden moghen,

12

Hieromme begeert mijn reden ende hebt die lief, ende ghi sult onderwijsinghen hebben.

13

De wijsheit is edel, ende die nemmermeer en verwelct, ende si wert lichtelijc gesien vanden genen diese liefhebben.

14

⁺Si voorcoemt dye ghene diese begheeren, dat si haer dyen eerst soude vertoonen,

+ C vers 14

15

die vanden licht tot haer waect, die en sal niet arbeyden, want hi salse voor sijn duere vinden sitten.

16

Daerom ist eenen volcomenen sin van haer te dencken, ende die om harent wille waect, die sal haest seker sijn,

17

want si gaet om soeckende die ghene, die haers waerdich sijn, ende in haer wegen sal si haer seluen dyen vrolijc verthoonen, ende si sal dien in alle voorsienicheyt te gemoet lopen,

18

want haer begin, is begeerte der alder warachtichsten onderwijsinge,

19

Hierom so is dye liefde die sorge der onderwijsinge ende die liefde is bewaringe haerder wetten.

20

Ende die bewaringe der wetten is die volbrenginghe der ongebreclijcheyt,

21

ende dye ongebreclickeit doet Gode aldernaest sijn.

22

Aldus brengt die begeerlicheit der wijsheit totten eewighen rijcke. ⁺

+ iij.regum iij.d numeri. xxvij.f Ioan. i.d. de. xvij.g. iiij.regum x.b.

23

Hierom ghy coningen des volcx ist dat ghi lust hebt in setelen ende scheptren, so bemint die wijsheit, op dat ghi inder eewicheyt regneren moget. Ghi alle die ouer die lieden gestelt sijt, hebt lief dat licht der wijsheit.

24

Mer wat wijsheyt is, ende hoe si gemaect si, ende ic salse vertellen, ende ic en sal die verholentheden Gods niet verbergen, mer ic sal haer van begin der geboorten ondersoecken, ende ic sal haer kennisse int licht setten, ende ic en sal die waerheyt niet verswijgen,

25

noch ic en sal met die veretterende nidicheit niet ouer den wech gaen, ⁺ want alsulcken mensche en sal der wijsheyt niet deelachtich sijn.

+ exo. xvij.c ecclesiast vij.b nu. xij.d

26

Maer die menichte der wisen is gesontheyt des aertrijcx. Ende een wijs coninc, is des volcx vasticheyt.

27

Daerom ontfaet onderwijsinge door mijn redenen, ende het sal v vorderen.