Den Bybel met groter neersticheyt ghecorrigeert (Liesveltbijbel 1542)

¶ Datmen die wijsheyt sal hooren, een vermaninghe van gherechte ende valsche vrientschappe.

Dat .vi. Capittel

1

⁺OM ws vriendts wille, en wilt ws naesten viant niet worden, Want dye quade sal lachter ende smaet beeruen, ende alle sondaer is nijdich ende tweetongich,

+ A vers 1

2

En verheft v nyedt inden voornemen ws verstauts, op dat dijne bladeren niet en verwelcken, ende dijne vrucht verderue, ende dat ghi blijft als eenen dorren boom,

3

Want een scalcke siele verderft

[p. *]

den ghenen diese heeft, ende si maect hem tot eenen spot sijnre vianden,

4

ende si brengt hem tot der godlooser deel. Een soet woort vermenichfuldicht die vrienden,

5

Het vermorwet die vianden, ende een gracelijcke tonghe, sal oueruloedich sijn in eenen goeden mensche,

6

ghi sult met velen vrientscap houden, ende ghi en sult wt duysenden maer eenen raetsman hebben. ⁺

+ mi. vij.f. Ma. x g

7

Ist dat ghi eenen vrient crijcht, so proeft hem eerst, ⁺ ende en gelooft hem v seluen niet lichtelijc, Want daer is een vrient na sinen tijt, ende hi en sal niet blijuen inden dagen der tribulatien,

+ B vers 7

8

ende daer is een vrient, die keert hem tot viantscap, ende kijft met v,

9

ende ist dat hi wat scandelijcx van v weet, dat verwijt hi.

10

Ende daer is een vrient, die een gheselle ter tafelen is, ende hi en sal niet blijuen inder tijt des noots,

11

Ist dat een vrient vast geduert, so sal hi v sijn, als v gelijck, ende hi sal ghetrouwelijc doen aen uwen huysgesinne,

12

Ist dat hi hem verootmoedicht teghen v, ende hem van uwen aensichte verbercht,

13

so suldi goede eenmoedige vrientscap hebben, sceyt van uwen vianden, ende slaet gade uwe vrienden.

14

Een getrouwe vrient is een stercke bescerminge, ende die dien vint, die vint eenen costeliken scat.

15

Bi eenen getrouwen vrient en is geen ghelijckenisse, ende geen gewichte gouts, ende siluers, en is weerdich tegen die goetheyt sijns geloofs.

16

Een ghetrouwe vrient is een medicine des leuens, ende der onsterflicheyt,

17

ende die den HERE vreesen, sullen hem vinden, Die God vreest, die sal sijn leuen wel goede vrientscap hebben, want na dat hi is, sal zijn vrient sijn.

18

Mijne kint, van uwer ioncheit op, ontfanct die leeringe tot grijser outheyt toe, so sult ghi wijsheit vinden.

19

⁺Gaet tot haer als die ploecht ende saeyt, ende ontbeyt haer goede vruchten,

+ C vers 19

20

Wandt ghi sult in haer werck een weynich arbeyden, ende haest sult ghy van haren vruchten eten,

21

Hoe te veel scherp is die wijsheyt den ongeleerden menschen, ende een onstantaftich mensche en sal in haer niet bliuen.

22

Die proeuinghe sal in dien sijn, als die cracht des steens, ende si en sullen niet vertoeuen, dien wech te worpen.

23

Want die leeringe der wijsheyt is na haren name, ende si en is niet veel menschen openbaer. Maer den welcken si bekent is, die blijft tot Gods aenschouwinghe toe.

24

⁺Hoort mijn sone, ende ontfanckt den raedt des verstandenisse, ende en verworpt mijnen raet niet van v.

+ D vers 24

25

Steect uwen voet in haer boeyen, ende uwen hals in haren halsbant,

26

Buycht v scouderen daer onder, ende draechtse lijdtsamelic, ende en wort niet traech van haren banden,

27

In allen uwen ghemoede gaet tot haer, ende hout haer wegen in allen uwen crachten.

28

⁺Ondersoectse, ende si sal v gheopenbaert worden, ende als ghi die hebt, so en verlaetse niet. Inden wtersten sult ghi rust in haer vinden,

+ E vers 28

29

ende si sal v worden ghekeert tot verlustinge, ende haer boeyen sullen v worden tot een bescerminge der stercheit,

30

ende stuenuoeten der cracht, ende haren halsbant sal wesen tot een schoon cleet der glorien,

31

Want die schoonheyt des leuens is in haer, ende haer banden zijn een aenbiddinge der salicheyt.

32

Ghi sultse cleeden met eenen costeliken cleede der glorien, ende ghy sult v die croone der medeverblijdinghe opsetten.

33

Mijne kint, ist dat ghi mi aenmerckt, ghi sultse leeren, ende ist dat ghi v gemoet daer toe geeft, so sult ghi wijs sijn.

34

Ist dat ghi v oore neder buycht, ghi sult leeringe ontfaen, ende ist dat ghi bemint te hooren, soo sult ghi wijs sijn.

35

Staet inde menichte der voorsich-tiger ouders, ende wort wt der herten haerder wijsheyt toegeuoecht, op dat ghi alle gods vertellingen moecht hooren,

36

ende dat die bispraken des loofs van v niet en ontulien. Ende ist dat ghi eenen wisen siet, ontwaect tot hem, ende uwen voet betrede die trappen sijnder doren.

37

Hebt uwe gedachten in Gods geboden, ende sijt alder meest gestadich in sinen beuelen, ende hi sal v een hert gheuen, ende die begeerlicheit der wijsheit sal v ghegeuen worden.