Den Bybel met groter neersticheyt ghecorrigeert (Liesveltbijbel 1542)

¶ Van die vruchte ende profijt der vreesen Gods ende der wijsheyt die welcke die boose ende schalcke niet aen en nemen

Dat .xv. Capittel

1

⁺† DIe God vreest, ⁺ sal goet doen, ende die die gerechticheyt onthoudende is, salse vercrijgen,

+ A vers 1

+ pro. viij Act. x. deu. iiij

2

ende sal hem te ghemoete comen, als een geeerde moeder, ende sy sal hem ontfaen als een wijf vanden maechden,

3

Ende si sal dien spijsen metten broode des leuens, ende der verstandenissen, ende si sal hem metten water der salicheit drencken,

4

Ende si sal in dien vast gemaeckt werden, ende en sal niet gebuycht werden, ende si sal hem onthouden, ende hi en sal niet bescaemt werden,

5

ende si sal hem verhogen bi sinen naesten, ende si sal sinen mont int midden der gemeynten open doen,

6

ende si sal dien met den gheest der wijsheit, ende der verstandenissen veruullen,

7

ende si sal hem metten cleede der glorien cleeden, ende si sal ghenoechlicheit, ende verhueginge op hem, tot eenen schat vergaderen, ende si sal hem met eenen eewigen name beeruen. *

8

Onuerstandinge menscen en sullense niet aengrijpen, ende wel gesinde menschen, sullen haer te gemoet ghaen, Die schalcke menschen en sullense niet sien, Want si is verre af, van hooueerdicheit ende bedroch

9

Luegenachtige mannen en sullen haerder niet gedachtich zijn, ende warachtige mannen sullen in haer werden gheuonden, ⁺ ende si sullen voortganc hebben totter aenschouwinge Gods toe.

+ B vers 9

10

Den lof en is niet schoon in des sondaers mont, Want hi en is vanden HERE niet gesonden,

11

Want van Gode is volmaeckte wijsheyt, ende den lof sal bi Gods wijsheit staen, ende sal oueruloeyen in eenen getrouwen mont, ende die verheerder salse hem geuen, en segt niet bi Gode, si is van hier, En doet niet dat God hatet,

12

en segt niet, Hi heeft mi in dolingen gebrocht, want die godlose menschen en zijn hem van gheenen noode, ⁺

+ phi. i iij. ij.d Ioan xvi f

13

God hatet alle grouwel der dolingen, ende die God vreesen en sullen dat grouwel niet liefhebben.

14

God heeft den mensche van beginne gemaect, ende heeft dien inder hant zijns raets gelaten, ⁺ Hi heefter zijn geboden ende beuelen toe gedaen,

+ Dute. viij.a. i.re. iij.f

15

Ist dat ghi dye geboden wilt houden, so sullen si v behouden, ende inder eewicheit behaechlike trouwe houden,

16

Hi heeft v water ende vier voorgeset, tot welc dat ghi wilt, steeckt v handt wt,

17

voor den mensche is leuen ende doot, goet ende quaet, welc hem behaecht, sal hem ghegeuen werden,

18

want die wijsheyt Gods is vele ende sterck inder macht siende alle menschen sonder ophouden.

19

Die oogen des HEREN, zijn totten genen die hem vreesen, ende hi bekent alle des menschen neersticheidt,

20

Hy en heeft nyemant geboden ongodlic te doen, ende hy en heeft nyemanden consent ghegheuen te sondighen, Hi en begheert gheen menichte der ongetrouwer ende der onnutter kinderen.