Den Bybel met groter neersticheyt ghecorrigeert (Liesveltbijbel 1542)

¶ Hoe datmen God vreesen ende sijn geboden houden sal van onderscheyt der dagen ende menschen, In alle wercken Gods zijn altijt twee teghen malcanderen, Hoe dat die ouders den kinderen gheen ghewalt ouer haer geuen en sullen Hoe datmen dat huysghesinne houden sal

Dat .xxxiij. Capittel

1

⁺DEn Godureesenden, en sullen gheen quaden ontmoeten, mer God sal hem inder proeuinghen onderhouden,

+ A vers 1

2

ende sal hem vanden quaden verlossen. Die wijse en hatet die geboden ende gherechtigeden niet,

3

ende hi en sal niet onder ghestooten werden, als dat schip in die waterbaren, Een wijs mensche gelooft der wet Gods, ende die wet is hem ghetrouwe

4

Bereyt v met uwer redenen, nae dien dat v die rechter vragen sal, so wert ghi verhoort, bijnt wijsheit te samen, so moecht ghi antwoort gheuen,

5

Dat binnenste des herten van eenen sotte is als een wagen radt, ende sijn gedachten sijn als een draeyende asse,

6

⁺Gelijc een sterc snel paert briescht, onder elcken dye daer op sittet, also is ooc een vrient die een beschimper is,

+ B vers 6

7

Waerom gaet den eenen dach den anderen dach te bouen, ende weder dat licht, den lichte, ende dat iaer den iaer, hoe wel nochtans alle die daghen des iaren vander sonnen comen,

8

Si sijn vander Gods kennissen verscheyden, als dye sonne gemaect was, ende dat gebot houdende, door die wijsheyt Gods, werden si ghedeelt

9

Ende hi veranderde die tijden, ende haer hoochtijdelijcke dagen, ende wt dien vierden si die hoochtijdelijcke dagen, eenen sekeren tijt lanc.

10

Wt dien verhief ende groot maecte God, ende wt dien sette hy tot een ghetal der dagen,

11

ende alle menschen zijn vanden gronde, ende wt der aerden, daer Adam af gheschapen is,

12

in die menichte der consten des HEREN, heeft hise van een ghescheyden, ende heeft haer wegen verandert.

13

Ende wt hen ghebenedide ende verhoochde hi, ende wt hen heilichde hi, ende schictese tot hem, ende wt hen veruloecte ende vernederde hi, ende hi bekeerde die van haerder versceydinge,

14

Gelijc dat slijc des potbackers in zijn hant is, dat te sceppen ende te beschicken,

15

Alle sine wegen sijn na sine bescickinge, alsoo is die mensce in dies hant, die hem gemaect heeft, ende hy sal hem weder geuen na sijn oordeele.

16

⁺Teghen tquaet is tgoet, ende die doot teghen leuen, ⁺ also is die sondaer ooc teghen den rechtueerdigen man, ende also aenscout in alle die wercken des alder ouersten. Twee teghen twee, ende een teghen een.

+ C vers 16

+ ij.co. vi c

17

Ende ic die alder laetste ontwaecte, ende als de gene die wijnbesien achter die wijngaert lesers vergadert Ic selue hoopte ooc in die benedidinghe Godts, ende ic veruulde die wijnpersse als die den wijngaert leset,

18

Aensiet dat ic mi seluen niet alleen ghearbeyt en hebbe, mer ooc allen den ghenen die die onderwijsinge soecken. ⁺

+ ro. xij.c. i.cor. xij g ephe. ij f

19

Hoort mi, ghi groote van state, ende alle volcken, ende ghi regeerders der ghemeenten, verneemt met uwen ooren.

20

En gheeft uwen kinde, noch uwen wijue noch uwen broeder, ende vrient, geen macht ouer v in uwen leuen, ende en gheeft gheenen anderen v haue ende goet niet op dat v misschien niet en berouwe, ende hen dan af moet bidden.

21

Also langhe als ghi leuende blijft, ende versaemt, so en verandere v gheen mensch

22

Het is beter dat die kinderen v bidden, dan dat ghi op die handen uwer kinderen siet.

23

Weest voorbarich in allen uwen wercken, op dat v eersaemheyt tot schanden niet en keere inder tijt der voleyndinghe der daghen ws leuens, ende inder tijt ws wtgancx soo deelt v erffenisse wt.

24

Voeder, ende die roede, ende den laste behoort den ezele. Broot ende straffinghe, ende werck den knechte.

25

Geeft uwen knechte te wercken, ende ghi sult rust hebben, Laet ghi hem ledich sijn, soo sal hi vryheyt soecken.

26

Dat iock ende den toom, crommen eenen harden hals, ende den knechte, buygen die ghestadige werckinghen.

27

Eenen quaetwilligen knecht behooren pijninghe ende voetboeyen.

28

Seynt hem te wercke dat hi niet ledich en si, Want ledicheyt heeft groote quaetheydt gheleert

29

Stelt hem te wercke, want also betaemt hem Maer ist dat hi niet gehoorsaem en is, so bijndet hem met voetboeyen,

30

nochtans dat ghi hem niet te lastich en valt, mer sonder oordeelen en doet niet.

31

Hebt ghi eenen ghetrouwen knecht, die si v als v siele. Handelt hem als uwen broeder, wandt ghy hebt hem inden bloede zijnder sielen gecocht,

32

Ist dat ghi hem onrechtueerdelic quetst, so sal hy gaen loopen, ende ist dat hi verheffende wech gaet, wien dat ghi soecken sult, ende in welcken wech ghi hem soecken sult, en weet ghi niet