Den Bybel met groter neersticheyt ghecorrigeert (Liesveltbijbel 1542)

¶ Van Iosua den hooftman ende sine eerlijcke feyten, Van sinen mede geselle Caleb, Vanden richteren ende ouersten in Israel tot Samuel toe, die een ghetrou propheet was inden volcke Gods.

Dat .xlvi. Capittel

1

⁺IOsua de sone Nun, ⁺ Moses nacomer des propheten

+ A vers 1

+ Numeri xxvij deu. iij

2

was sterck inden oorloge, die groot was na sinen name, die alder grootste ter salicheit der wtuercorender Gods, te verwinnen die tegen opstaende vianden, op dat hi die erffenisse Israels soude vercrijgen,

3

Welcke heerlicheit hi vercreech sijn handen opheffende, ende te werpen sweerden tegen dye stadt.

4

Wie heeft voor hem also heerlick wederstaen Want hi die HERE selue, versloech die vyanden

5

Oft en is die sonne in sijnder gramschap niet belet ende eenen dach is geworden als twee?

6

Hi heeft den alderhoochsten aengeroepen, machtich in te beuechten in allen siden, ende die grote ende heylige God hoorde hem in hagelsteenen der alder stercster cracht. ⁺

+ nu. xiiij

7

Hi maecte eenen storm tegen dat viantlike volc, ende inden nederganc verdede hi die vianden,

8

Op dat die heydenen zijn mogentheit souden bekennen, want het en is niet licht tegen God te vechten, ende hi volchde die machtige van achter rugghe.

9

Ende inden daghe Mosi, dede hi ende Caleb dye sone Iephune, een vriendelick stuck, die tegen dye vianden stonden, ende dat volc van sonden bewaerden, ende de murmuratie der quaetheit stilden.

10

Ende si twee gestelde worden behouden, vanden getale van seshondert dusent voetknechten, die in te leyden tot die erffenisse, totten lande daer huenich ende melc vloeyt.

11

⁺Ende die HERE gaf dien Caleb stercheit, ⁺ ende tot in die outheyt bleef hem sijn cracht, op dat hi soude opgaen in een hoge plaetse der aerden, ende sijn saet vercreech die erffenisse,

+ B vers 11

+ Iudi. i Nu. xiij Deu. i

12

ende alle die kinderen Israels sagen dat het goet is den heyligen God gehoorsaem te sijn.

13

Ende elcke vanden rechters, bisonder met haren name, der welcker herte niet gehoereert en hadde, die niet afghekeert en sijn vanden HERE,

14

op dat haer memorie in die gedachtenisse si

15

ende haer beenen groeyden van haerder plaetsen, ende haren naem blijft eewelijc.

16

Samuel des HEREN propheet, bemint van sinen HERE God, ⁺ hi stelde eenen coninc, ende hi salfde die princen in sinen volcke.

+ C vers 16

17

Hi ordelde die vergaderinge in die wet des HEREN, ende hi sach Iacobs God, ende in sijnder trouwen is hi een propheet gheproeft te wesen.

18

Ende hi is in sinen woorden getrou geuonden, want hi sach den God des lichts. Ende hi aenriep den almachtigen HERE,

19

doen hem die vyanden rontsom benaut hadden, als hi gheoffert hadde die suygende lammeren.

20

Ende die HERE donderde vanden hemel, ende hi heeft sijn stemme doen horen in groten geluyde,

21

ende hi vernielde die princen der Tyriers, ende alle die hertogen Philistijm.

22

Ende voor den tijd des eynde sijns leuen, ende der werelt gaf hi getuygenisse int aenschouwen des HEREN ende des ghesalfdens. Hi en ontfinc van geenen vleessche gelt, noch niet totten geschoeyte toe, ende geen mensch en besculdichde hem

23

Ende hier na sliep hi, ende hi dedet den coninc bekennen, ende hi toonde hem dat eynde zijns leuens, ende hi verhief sijn stemme vander aerden, inder prophetien, om des volcx sonden wt te wisschen.