Den Bybel met groter neersticheyt ghecorrigeert (Liesveltbijbel 1542)

Hier beghint dat tweede boeck der Machabeen.

¶ Die Ioden scrijuen Aristobolo eenen brief, si gheuen hem te kennen reyninghe ende der louerhutten feeste ende vanden viere dat inden pur begrauen was.

Dat eerste Capittel.

1

⁺DIe broeders die Ioden die te Ierusalem sijn, ende die inden Iootschen lantschap sijn, groeten ende wenschen goeden vrede, den broeders, den Ioden, dye in Egypten sijn,

+ A vers 1

2

God doe v wel, ende ghedencke sijns verbonts, dat hi ghesproken heeft tot Abraham, ende Isaac, ende Iacob, sinen getrouwen knechten,

3

ende gheuen v allen een herte ende moet,

4

dat ghi hem dient, ende sinen wille doet, met goeder herten ende willigen moede.

5

Hi doe v herten open in sijn wet ende in sijn gheboden, ende make vrede. Hy verhore v ghebeden, ende werdet v versoent,

6

noch hi en verlate v niet. ⁺

+ deu. xxx xxvij.

7

Int .C. ende .lxix. iaer, als Demetrius regneerde hebben wi Ioden v gescreuen die tribulatien, ende stormen die ons ouercomen sijn, in desen iaren, van dier tijt dat Iason wech ginc van theylich landt, ende vanden rijcke.

8

Si aenstaken die poorten ende storten donschuldighe bloet. Ende wi baden totten HERE, ende wi sijn verhoort, ende wi offerden offerhanden, ende terwenbloeme ende broot, ende wi aenstaken keersen ende wi setteden brooden voort.

9

Ende nv hout gestadelijc die daghen der louertenten der maent Casleu, ⁺ int .C. ende .lxxxviij. iaer.

+ Casleu dat is den eersten dach van december.

10

Tvolc dat te Ierusalem inden Iootschen lande is, ende den raet, ende Iudas wenschen Aristobolo den meester Ptholomei des conincx die van tgeslachte der gesalfder priesters is, ⁺ ende den Ioden dye in Egypten zijn, salicheyt ende ghesontheyt.

+ B vers 10

11

Van groote periculen verlost sijnde van God, dancken wi hem grootelic als die tegen sodanigen coninc ghestreden hebben.

12

Hi dedese van Persen wt crielen, die teghen ons, ende die heylige stadt vochten.

13

Want doen hi dye leydtsman selue was in Persen, ende een ongemeten heyr met hem, viel hi in Naneens tempel, bedroghen met den raet der priesteren Nanee,

14

want Antiochus ende sijn vrienden quamen tot dier plaetsen om met haer te woonen, op dat hi veel ghelts soude ontfaen onder den naem der ingeschoncken ghiften.

15

Ende doen die Priesters Nanee hem tghelt voorgesedt hadden ende Antiochus ingegaen was met luttel volcx binnen den pant des tempels des afgods, ⁺ so sloten si den tempel.

+ C vers 15

16

Ende als Antiochus ingegaen was, ende eenen heimeliken toeganc open gedaen sijnde, werpen si steenen ende dooden den hooftman, ende die gene die met hem waren, ende deeldense van lede te lede, ende hieuen haer hoofden af, ende werpense daer buyten.

17

Van al si God gebenedijt, die dongodlike geleuert heeft in onser hant.

18

Hierom so sullen wi die suueringe des tempels doen opten .xxv. dach der maent Casleu, soo docht ons van noode, v lieden dat te kennen te gheuen, op dat ghi ooc hout den dach der Louertenten ende den dach des viers, die welc ons ghegeuen is, doen Neemias den tempel, ende den outaer ghetimmert had ende offerande offerde.

19

Want doen ons vaders in Persen geleyt worden, so namen die priesters dye doen

[p. *]

Gods dienaers waren, dat vier heymelick vanden outaer ende verberchdent in een dal daer eenen diepen ende droogen heymeliken put was,

20

ende daer in verborgen sijt sekerlijc, also dat die plaetse allen menscen onbekent was. Mer doe veel iaren voorbi waren gegaen, ende het God behaechde, dat Neemias vander Persen coninc gesonden wert, sant hi dye kints kinderen der priesters, diet vier geborgen hadden, om tvier te soecken, ende also si ons vertelden, en vonden si geen vier, mer dick water

21

ende hi hiet hen putten ende tot hem brenghen, Ende die prister Neemias hiet die offerhanden die op geset waren met dien water besprengen, ende die houten, ende die dingen die daer op geset waren,

22

ende als dat gedaen was ende den tijt daer was dat de sonne scheen die te voren in donckerheit was, ende daer is een groot vier aengesteken, ⁺ so dat si al verwonderden.

+ iiij.re. x. ij.pa. vij ge. xvij. Le. xiij.

23

Mer al die priesteren baden, doen dofferhande volbracht wert. Ionatas begonst voor te bidden, ende die ander antwoorden.

24

⁺Ende dit is dat gebet Neemie. O HERE God scepper alre creatueren, ⁺ veruaerlijc, sterc, rechtuerdich, ende ontfermhertich, die alleen goet sijt, alleen een heerlic coninc, alleen rechtuerdich, ende alleen almachtich, ende eewich, die Israel van allen quaden verlost,

+ D vers 24

+ Gebet

25

die den vaderen wtuercoren hebt ghemaect, ende hebtse heylich gemaect

26

ontfangt die offerhande, voor alle v volc Israels, ende bewaert v deel ende heylicht dat,

27

die gene die van ons verstroeyt zijn, vergadert, verlost den genen die den heydenen dienen, ende aenschout die versmade, die verworpen sijn, op dat die heydenen weten, dat ghi ons God sijt,

28

O HERE vernedert ende straft die gene die ons verdrucken, ende smaet doen, in houerdicheit,

29

Stelt v volc in v heilige plaetse, gelijc Moyses heeft gheseyt.

30

⁺Ende die priesters speelden lofsangen, tot dat die offerhande verbrant was.

+ E vers 30

31

Ende doen dofferhande verteert was hiet Neemias die groote steenen met douerbleuen water ouergieten.

32

Doen dat gesciet was so is daer wt een vlamme aengesteken, mer si wert verteert vanden lichte dat vanden outaer blincte,

33

ende als dat dinc geopenbaert was, so ist der Persen coninc gebootscapt, dat in de plaetse in welcke plaetse de priesters die ouergeuoert waren, dat vier geborgen hadden, water geuonden wert,

34

van welcken Neemias ende die met hem waren die offerhanden suuerden.

35

Die coninc aenmerckende ende dit dinc neerstelic ondersoeckende, maecte hi hem eenen tempel op dat hi onderuinden soude dat daer ghedaen was, ende doe hi dat onderuonden had, so scencte hi den priesters vele goets, ende ander giften,

36

ende nemende in sijn hant gaf hijse haerlieden. Neemias hiet dese plaetse Nepthar, welcke vertaelt wert, een suuermakinge. Mer bi vele hiet si Nephi.